Toshkent viloyatida “kartoshka” ichidan 77 kg narkotik topildi

Toshkent viloyatida Damas rusumli avtomobilda 3 ta qopda kartoshka shaklidagi bog‘lam ichida bo‘lgan 77 kilogramm opiy va gashish ortib ketayotganlar qo‘lga olindi. Bu haqda Davlat bojxona qo‘mitasi Matbuot xizmati xabar bergan.

Qayd etilishicha, joriy yilning 13 yanvar kuni Toshkent tumanining Hasanboy qishlog‘ida Davlat bojxona qo‘mitasi va Davlat xavfsizlik xizmati xodimlari tomonidan o‘tkazilgan tezkor tadbirda kuzatuv ostidagi shaxslar Damas rusumli avtomashinaga 3 ta qopni ortib ketayotgan vaqtda qo‘lga olingan.

Qoplarda kartoshka shakliga keltirilgan 481 dona o‘ramlar borligi aniqlangan. Ularning ichidan o‘rami bilan hisoblaganda 77 kg 95 grammni tashqil qiluvchi opiy va gashish topilgan. 

Bundan tashqari, giyohvand moddalarni qabul qilishi kerak bo‘lgan chet el fuqarosi ham qo‘lga olingan.

Hozirda ushbu holat yuzasidan tezkor-qidiruv tadbirlari o‘tkazilib, boshqa aloqador shaxslarni aniqlash yuzasidan tegishli choralar ko‘rilmoqda. Shuningdek, jinoyat ishi qo‘zg‘atilib, tergov harakatlari olib borilmoqda.