Top-500 talikka kiruvchi universitetni tamomlaganlarga qo‘shimcha ustama to‘lab beriladi

Xalqaro reytinglarning top 500 taligiga kiruvchi universitetni tamomlagan yoki ilmiy daraja olgan kadrlarning maoshiga 12 milliondan 22,5 milliongacha ustamalar qo‘shib beriladi. Bu haqda Davlat xizmatini rivojlantirish agentligi axborat xizmati rahbari Sevara Zokirova AOKAda o‘tkazilgan brifingda ma’lum qildi. 

Qayd etilishicha, qo‘shimcha ustamalar Davlat xizmatini rivojlantirish agentligi, yosh mutaxassis va uning ish beruvchisi o‘rtasida imzolangan shartnoma asosida har oy to‘lab boriladi. Shartnoma 3 yilgacha bo‘lgan muddatga tuziladi. To‘lovlar ish beruvchi tomonidan amalga oshiriladi.

Xalqaro reytingda 1-dan 100-o‘ringacha bo‘lgan xorijiy oliy ta’lim muassasalarining bakalavriat bosqichini tamomlagan yosh mutaxassislarning lavozim maoshlariga bazaviy hisoblash (BHM) miqdorining 30 barobari miqdorida (9 million so‘m) ustama belgilanadi. Magistratura bosqichini tamomlagan yosh mutaxassislarning lavozim maoshlariga BHMning 40 barobari miqdorida (12 million so‘m), xorijiy oliy ta’lim muassasalarida ilmiy daraja (Phd va unga tenglashtirilgan boshqa ilmiy daraja) olgan yosh mutaxassislarning lavozim maoshiga BHMning 75 barobari miqdorida (22,5 million so‘m), ustama beriladi.

Xalqaro reytingda 101-dan 300-o‘ringacha bo‘lgan xorijiy ta’lim muassasalarining bakalavriat va magistratura bosqichini tamomlagan mutaxassislar mos ravishda BHMning 20 barobari(6 million so‘m) va 30 barobari (9 million so‘m) miqdorida ustamaga ega bo‘ladi. Xuddi shu o‘rindagi oliy ta’lim muassasalarida ilmiy darajaga ega bo‘lganlarga BHMning 60 barobari (18 million so‘m) miqdorida qo‘shimcha haq to‘lanadi.

Reytingda 301-dan 500-o‘ringacha bo‘lgan universitetlarni tamomlagan bitiruvchilarga esa BHMning 15 (4,5 million so‘m) dan 50 barobarigacha (15 million) so‘m ustamalar to‘lab beriladi. 

Ma’lumot uchun, hozirgacha agentlik tomonidan 66 nafar yosh mutaxassis bilan ustama to‘lash yuzasidan shartnoma tuzilgan. 

Xalqaro e’tirof etilgan reyting beruvchi tashkilotlar – Quacquarelli Symonds World University Rankings, Times Nigher Education, Academic Ranking of World University hisoblanadi.