Surxondaryoning Boysun va Oltinsoy tumaniga kuchli sel keldi

Kecha, 13 may kuni soat 21:00 da kuchli yomg‘ir yog‘ishi natijasida Surxondaryo viloyatining Oltinsoy tumani hududidan oqib o‘tuvchi “Oltinsoy” soyining suv hajmi sezilarli darajada oshgan. Bu haqda FVV xabar berdi.

Mazkur holat natijasida suv toshqini yuzaga kelishi mumkinligi sababli viloyat Favqulodda vaziyatlar boshqarmasi hamda Favqulodda vaziyatlarda ularning oldini olish va harakat qilish davlat tizimi (FVDT) kuch va vositalari yordamida ushbu hududda istiqomat qilayotgan 900 nafar fuqaro xavfsiz (yaqin qarindoshlari uylari) hududga vaqtincha ko‘chirildi.

Bundan tashqari, shu kuni Boysun tumanidagi “Pasurxi” mahallasiga Boysun tog‘ tizmasiga surunkali yomg‘ir yog‘ishi natijasida “Oybarak” soyi orqali sel kelgan.

Shuningdek, tumanning “Hunarmandlar” mahallasidan oqib o‘tuvchi “Avlod” soyi orqali sel kelishi oqibatida “Avlod” hamda “Sariosiyo” qishloqlarini bog‘lab turuvchi ko‘prikni suv bosganligi tufayli avtomobillarning harakatlanishi vaqtincha to‘xtatilgan.

Vaziyat viloyat Favqulodda vaziyatlar boshqarmasi tomonidan to‘liq nazoratga olingan. Ayni damda boshqarma qutqaruvchilari hamda FVDTning 150 dan ortiq xodimi, shuningdek, 20 ga yaqin texnika yordamida sel oqibatlarini bartaraf etish ishlari olib borilmoqda.

Sel oqibatida jabrlangan va halok bo‘lganlar to‘g‘risida ma’lumot kelib tushmagan.

Avvalroq, Navoiy viloyatining Zarafshon shahrigaa kuchli sel kelgani haqida xabar bergan edik. Natijada 300 kishi evakuatsiya qilingandi.