Sotilmagan “Paxtakor” va baloga qolgan O‘FA – Sport dayjesti

Bugun otib ketilgan MMA jangchisi, sotuvga qo‘yilgan "Paxtakor" va Osiyo kubogidagi dastlabki g‘alabasiga erishgan O‘zbekiston milliy terma jamoasi haqida gaplashamiz. Assalomu alaykum. QALAMPIR.UZ’da sport dayjesti.

Nursulton Ro‘ziboyevning UFC'dagi jangi tasdiqlandi

O‘zbekistonlik UFC jangchisi Nursulton Ro‘ziboyev tashkilotdagi navbatdagi jangini amerikalik Sedrik Dyumaga qarshi o‘tkazadi. 

Ro‘ziboyev-Dyuma jangi 30 mart kuni Amerikaning Atlantik-Siti shahri mezbonlik qiladigan UFC Fight Night turniri doirasida bo‘lib o‘tadi.

Nursulton Ro‘ziboyev hozirgacha UFC'da faqatgina 1 ta jang o‘tkazib, raqibidan ustun kelgan. 28 yoshli Dyuma esa tashkilotda 3 marta oktagonga ko‘tarilib, 2 marta raqiblaridan ustun kelgan, 1 ta jangda esa imkoniyatni boy bergan.

Hozirda Nursulton Ro‘ziboyev AQSHda bo‘lajak jangiga tayyorgarlik ko‘rmoqda. Amerikaga uchib ketishidan bir necha soatlar oldin esa Ro‘ziboyev QALAMPIR.UZ ofisida mehmon bo‘lib, saytimizga intervyu berdi va o‘zi bilan bog‘liq bir qator savollarga oydinlik kiritdi. Jumladan O‘zbekiston pankration va grepling assotsiatsiyasi tomonidan o‘tkazilgan turnirda shogirdi bilan sodir bo‘lan holat va kelgusi rejalari haqida fikrlarini bildirib o‘tdi. To‘liq intervyuni YouTube sahifamizda tomosha qilishingiz mumkin.

OFK O‘FAga intizomiy ish ochdi

Osiyo futbol konfederatsiyasi (OFK) O‘zbekiston milliy terma jamoasining Osiyo kubogi 1-turi doirasida Suriyaga qarshi o‘yinda milliy terma jamoa muxlislari turnirga aloqasi bo‘lmagan reklama kompaniyalari futbolkalarini kiyib tribunada o‘tirgani uchun O‘zbekiston futbol assotsiatsiyasiga (O‘FA) nisbatan intizomiy ish ochdi. Bu haqda futbol mutaxassisi Alisher Nikimbayev o‘z Telegram sahifasida ma’lum qildi.

“Bu ajablanarli holat emas. O‘zbekistonda an’anaga ko‘ra, boshqalarning intellektual huquqlariga beparvolik bilan munosabatda bo‘lish mavjud. E’tiborsizlik va oson pul topish istagi O‘FAni jarimaga tortilishiga olib kelishi mumkin”, deyiladi manba xabarida.

Ma’lumot uchun, 13 yanvar kuni bo‘lib o‘tgan O‘zbekiston-Suriya o‘yini nursiz durang bilan yakunlandi. 

18 yanvar kuni futbol bo‘yicha Osiyo kubogining 2-turi doirasida O‘zbekiston-Hindiston bahsi bo‘lib o‘tdi. O‘yin o‘zbekistonlik futbolchilarning 3:0 hisobidagi g‘alabasi bilan yakunlandi.

Uchrashuvdagi barcha gollar 1-bo‘limda kiritildi. “Oq bo‘rilar” safida gollarga Abbosbek Fayzullayev, Igor Sergeyev va Sherzod Nasrullayev mualliflik qildi. Shunday qilib Srechko Katanets shogirdlari musobaqadagi dastlabki 3 ochkoni qo‘lga kiritdi.

2-turdan so‘ng, O‘zbekiston milliy terma jamoasi o‘z guruhida 4 ochko bilan 2-o‘rinni egallab turibdi. Ikki turda ham g‘alabaga erishgan Avstraliya terma jamoasi 6 ochko jamg‘arib guruhda peshqadamlik qilmoqda. Keyingi turda

O‘zbekiston milliy terma jamoasi aynan Avstraliyaga qarshi guruh g‘olibligi uchun bahs olib boradi.

O‘zbekiston-Avstraliya o‘yini 23 yanvar kuni bo‘lib o‘tadi.

Maradonaning o‘g‘li otasi o‘ldirilganini da’vo qilmoqda

Argentina terma jamoasining sobiq futbolchisi Diyego Maradonaning o‘g‘li afsonaviy otasining vafoti haqida bayonot berdi. 

Unga ko‘ra otasi operatsiyadan so‘ng ahvoli og‘irlashganida, har tomonlama yordam ko‘rsatilmay o‘ldirilgan.

“Ochiq tergov olib borilmoqda. Biz Argentina adolatidan umidvormiz. Ishonchim komilki, bu shunday tugamaydi. Ular otamni o‘ldirishdi. Menda taxminlar bor. Biroq buni kim qilganini aytishga hali erta”, dedi kichik Diyego Maradona.

Turkiyada isroillik futbolchi qo‘lga olindi

Turkiyaning “Antaliyaspor” futbol klubining isroillik yarim himoyachisi Sagiv Yexezkel “ommaviy adovat va nafrat uyg‘otish”da ayblanib hibsga olindi. 

28 yoshli futbolchi “Isroil tomonidan G‘azo sektorida amalga oshirilgan qirg‘inni qo‘llab-quvvatlashdagi mas’uliyatsiz harakatlari tufayli” qo‘lga olingan.

14 yanvar kuni Sagiv Yexezkel “Antaliyaspor” - “Trabzonspor” uchrashuvida gol urdi, shundan so‘ng qo‘lidagi “100 kun. 7.10” yozuvi bor bandajni ko‘rsatdi.  

Bu orqali Yexezkel urushga qarshi bo‘lgani uchun ishora qilganini aytdi.

O‘yindan so‘ng “Antaliyaspor” klubi rahbariyati Yexezkelni jamoadan chetlatganini ma’lum qildi va u bilan shartnomasini bekor qildi. 

Qayd etilishicha, klub sportchini Turkiyaning “milliy qadriyatlariga qarshi gapirganlikda” ayblagan.

Holatga Isroilning sobiq bosh vaziri Naftali Bennet Turkiyaning harakatlarini ochiqchasiga qoralab, holatga munosabat bildirdi.

“Bu Turkiya – 2024. Uyat, Turkiya hukumati”, deydi Bennet.

15 yanvar kuni Antaliya prokuraturasi Yexezkelni hibsdan ozod qildi. 

Ma’lum bo‘lishicha, futbolchini olib ketish uchun Isroildan maxsus samolyot yuborilgan.

Mazkur mavzu yuzasidan tahliliy videosi Qalampir.uzning YouTube sahifasiga joylangan. Tomosha qilishni tavsiya qilamiz.

FIFA yilning eng yaxshilarini e’lon qildi

15 yanvar kuni Xalqaro futbol assotsiatsiyasi (FIFA) London shahrida bir qator nominatsiyalar bo‘yicha 2023 yilning eng yaxshilarini e’lon qildi.

Ovoz berish natijalariga ko‘ra, Argentina milliy jamoasi va AQSHning “Inter Mayami” klubi hujumchisi Lionel Messi yilning eng yaxshi o‘yinchisi deb topildi. 35 yoshli futbolchi sovrin uchun kurashda “Manchester Siti” a’zosi Erling Holand va PSJ hujumchisi Kilian Mbappeni ortda qoldirdi.

“Man Siti”ning ispaniyalik murabbiyi Xosep Gvardiola ortda qolgan yilning eng yaxshi murabbiyi deb e’tirof etildi. Pep bu borada italiyalik mutaxassislar Simone Inzagi va Luchano Spalettini ortda qoldirdi.

Shuningdek, ayollar futbolida ham eng yaxshilar aniqlandi. “Barselona” ayollar jamoasi a’zosi Aytana Bonmati eng yaxshi ayol futbolchi deb topilgan bo‘lsa, Angliya ayollar terma jamoasi murabbiyi Sarina Vigman eng yaxshi ayol murabbiy sovriniga ega chiqdi.

Benzema Fransiya IIVni sudga berdi

“Al-Ittihod” hujumchisi Karim Benzema Fransiya Ichki ishlar vaziri Jerald Darmanin ustidan sudga murojaat qilgan. Bu haqda futbolchining advokati Xyug Vije ma’lum qildi.

“Ba’zilar Benzemani Fransiyadan quvishni istasa, boshqalari u haqida to‘qigan bo‘htonlari uchun o‘zini aybdor sanamaydi. Xususan, o‘zini siyosatchi deb ataydigan odamning da’volari ham mutlaqo qonunga ziddir”, deydi Vije.

Eslatib o‘tamiz, avvalroq Fransiya Ichki ishlar vaziri Jerald Darmanin “Oltin to‘p” egasi Karim Benzemaning terror tashkiloti bilan aloqasi borligini aytgandi.

Darmanin futbolchini “Musulmon birodarlar” tashkilotiga aloqadorlikda ayblagan.

Ma’lumot uchun, Karim Benzema 2023 yilning yozida erkin agent sifatida Saudiya Arabistonining “Al-Ittihod” klubiga o‘tgan edi. Joriy mavsumda futbolchi klub safida barcha turnirlarda 11 ta o‘yin o‘tkazib, 6 ta gol urdi va 3 ta golli uzatmaga mualliflik qilgan. Futbolchining Saudiya klubi bilan shartnomasi 2026 yilning iyun oyi oxirigacha amal qiladi. “Transfermarkt” internet portaliga ko‘ra, forvardning taxminiy narxi 25 million yevroni tashkil qiladi.

“Paxtakor” sotuvga qo‘yildi

Prezidentning 2023 yil 24 martdagi PQ-102-son qaroriga asosan futbol klublari xususiylashtirilishi belgilangan.

Osiyo Futbol Konfederatsiyasi tomonidan futbol klublarining bir davlat tashkiloti tasarrufida bo‘lishi sog‘lom raqobat muhitini yaratishga to‘sqinlik qilishi bildirilgan. Bugungi kunda, futbol klublari davlat tashkilotlari va davlat ishtirokidagi korxonalar tasarrufida qolib, umumiy benefitsiar sifatida davlat bo‘lib qolmoqda.

O‘z navbatida, ushbu holat xalqaro prinsiplarga muvofiq hisoblanmaydi. Shunga ko‘ra, dastlab jozibadorligi yuqori bo‘lgan futbol klublarini xususiylashtirgan holda xususiy sektorning ulushini bosqichma-bosqich oshirish rejalashtirilgan.  

Shunga ko‘ra, tegishli xususiylashtirish dasturlariga muvofiq, Davlat aktivlarini boshqarish agentligi “Paxtakor futbol klubi” MCHJning 100 foiz davlat ulushi bo‘yicha ommaviy savdo jarayonlari boshlanganligini e’lon qildi.

Futbol klubining faoliyatini saqlab qolish, rivojlantirish va xalqaro darajaga olib chiqish;

Futbol klubi balansidagi barcha sport ob’ektlaridan, shu jumladan futbol maydonidan faqatgina sport faoliyati yo‘nalishlarida foydalanish;

“Paxtakor” futbol klubi akademiyasi faoliyatini saqlab qolish va rivojlantirish.

Bular Davlat aktividan kelgusida foydalanish va sotib olishga qo‘yiladigan asosiy talablardir.

“Paxtakor futbol klubi” MCHJning 100 foiz davlat ulushini bo‘yicha ommaviy savdo jarayonlari boshlanganligini e’lon qilinganidan so‘ng «Paxtakor» jamoasi klub boshqaruvidagi o‘zgarishlar haqidagi xabarlar bo‘yicha bayonot berdi.

Unga ko‘ra, klub boshqaruv tizimida hech qanday o‘zgarish bo‘lmagan.

Juda ko‘plab ijtimoiy tarmoqlarda «Paxtakor» futbol klubi rahbariyatida o‘zgarish bo‘lgani to‘g‘risida xabarlar tarqatildi.

“Paxtakor” futbol klubi shuni ma’lum qiladiki, klubimiz boshqaruvida o‘zgarish sodir bo‘lmadi va Jahongir Ortiqxo‘jayev klub raisi sifatida faoliyatini davom ettirmoqda”, deyiladi manba xabarida.

E’tiborlisi, 19 yanvarga kelib, ya’ni “Paxtakor” sotuvga qo‘yilganidan 2 kun o‘tiboq savdo jarayonlari to‘xtatildi.

Bu haqda Davaktiv agentligi o‘z rasmiy saytida ma’lum qildi.

Bunga esa jamoatchilik e’tirozi sabab qilib ko‘rsatildi.

“O‘tgan davr mobaynida jamoatchilik tomonidan bildirilgan fikrlarni o‘rgangan holda, “Paxtakor futbol klubi” MCHJning 100 foiz davlat ulushi bo‘yicha ommaviy savdo jarayonlari vaqtinchalik to‘xtatilganligi ma’lum qilinadi”, deyiladi manba xabarida. 

Aytish mumkinki, mujmal savdo pishmasligi va yetarlicha e’tirozlarga sabab bo‘lishi aniq edi. Shuni bila turib, davaktiv tomonuidan nega Paxtakor sotuvga qo‘yildi? Bo‘lar ish bo‘ldi. “Paxtakor” MCHJning 100 foiz ulushi sotuvga qo‘yildi, nega unda 2 kun o‘tiboq savdo to‘xtatildi? Aniq savollar ko‘p, aniq javoblarni esa hozircha hech qaysi manbadan topa olmayapmiz. Bu borada sizning fikringiz qanday? Izohlaringizni komentariyalarda yozib qoldiring.

Qozog‘istonda taniqli MMA jangchisi otib ketildi

Qozog‘istonning O‘skemen shahrida taniqli MMA jangchisi Elyor Yunusmetov halok bo‘ldi. 

Holat shu yilning 13 yanvar kuni sodir bo‘lgan. Noma’lum shaxs ko‘chada sportchiga qarata ikki marta o‘q uzgan. O‘qlar Yunusmetovning boshiga tekkan va sportchi voqea joyida halok bo‘lgan.

27 yoshli gumonlanuvchi politsiya tomonidan qo‘lga olingan. Surishtiruvga ko‘ra, noma’lum shaxs Yunusmetovni xotini bilan uchrashib yurganlikda gumon qilib, otganini aytgan.

Hozirda hodisa yuzasidan jinoyat ishi qo‘zg‘atilib, tergov harakatlari olib borilmoqda.

Ma’lumot uchun, Elyor Yunusmetov 1990 yilda tug‘ilgan. U MMA'dagi faoliyati bilan tanilgan. Yunusmetov xalqaro toifadagi sportchi hisoblanadi.

Bu ortda qolayogan hafta sportiga oid eng muhim yangiliklar edi. Sahifalarimizga obuna bo‘ling, fikrlaringizni izohlar bo‘limida yozib qoldiring. Salomat bo‘ling.