SSV monopoliyaga qarshi qonunchilik talablarini buzdi
Jamiyat
−
06 avgust 2019
3108Monopoliyaga qarshi kurashish qo‘mitasi SSV monopoliyaga qarshi qonunchilik talablarini buzgani haqida ogohlantirdi.
2019 yilning 4 aprel kuni Xorazm viloyati Sog‘liqni saqlash boshqarmasi tizimdagi barcha davolash profilaktika muassasalariga “Urganch kitob markazi” MCHJdan kitob sotib olishda faol ishtirok etishni ta’minlash so‘ralgan ko‘rsatma xatni yuborgan. Bu bilan, shartnomalar tuzishda ustunlik berish, ayrim xo‘jalik yurituvchi sub’ektlarning faoliyati uchun boshqa kamsituvchi yoki imtiyozli shartlar (sharoitlar) belgilanishi natijasida O‘zbekiston Respublikasi “Raqobat to‘g‘risida”gi Qonunining 12-moddasi talablarini buzilishiga yo‘l qo‘yilgan.
Bu kabi holat Jizzax viloyatida ham sodir etilgan. Xususan, Jizzax viloyati sog‘liqni saqlash boshqarmasi o‘zining xati bilan boshqarma tasarrufidagi shifoxonalar, birlashmalar, poliklinika va QFPlari tibbiy chiqindilarni tashish hizmati bo‘yicha “Maxsus tibbiy utilizatsiya” MCHJ bilan shartnomalar tuzishga ko‘rsatma bergan. Natijada, raqobatni cheklaydigan, ya’ni ayrim tadbirkorlik sub’ektlariga shartnomalar tuzishda ustunlik berish harakatlariga yo‘l qo‘yilgan. Mazkur qonunbuzilish holati tegishli tartibda Qo‘mitaning Maxsus komissiyasi tomonidan ko‘rib chiqilib, kamchiliklarni bartaraf etish va kelgusida takrorlamaslik bo‘yicha yuborilgan ko‘rsatma ijrosi ta’minlandi. Jizzax viloyati sog‘liqni saqlash boshqarmasining qo‘shma buyrug‘ini qayta ko‘rib chiqilishiga erishildi.
2019 yilning iyun oyida Qo‘mita tomonidan Sog‘liqni saqlash vazirligining 11 ta hududiy boshqarmalari tomonidan 37 ta holatda raqobatni cheklaydigan harakatlarni sodir etish holatlari aniqlandi.
Aniqlangan barcha qonunbuzilish holatlari belgilangan tartibda Qo‘mitaning Maxsus komissiyasi tomonidan ko‘rib chiqildi. 9 ta viloyat sog‘liqni saqlash boshqarmalariga nisbatan raqobat to‘g‘risidagi qonun hujjatlarini buzilish holatini belgilangan muddatda bartaraf etish to‘g‘risida ko‘rsatma berildi, raqobatni cheklashga olib kelgan 3 ta hujjatlar bekor qilindi, 2 ta boshqarma tomonidan yo‘l qo‘yilgan qonun buzilishi holati ixtiyoriy ravishda bartaraf etildi.
LiveBarchasi