Sohiba Gafarova Mirziyoyevga Aliyevning salomini yetkazdi
Jamiyat
−
01 aprel 2022
7440Bugun, 1 aprel kuni O‘zbekiston Respublikasi Prezidenti Shavkat Mirziyoyev O‘zbekistonda tashrif bilan bo‘lib turgan Ozarbayjon Respublikasi Milliy Majlisi raisi Sohiba Gafarovani qabul qildi. Bu haqda Prezident matbuot xizmati xabar berdi.
Ta’kidlanishicha, parlament rahbari O‘zbekiston yetakchisiga samimiy qabul uchun minnatdorlik bildirib, Ozarbayjon Prezidenti Ilhom Aliyevning salomi va eng ezgu tilaklarini yetkazgan.
Uchrashuvda umumiy tarixiy ildizlar, yagona din, mushtarak til, madaniyat, an’ana va qadriyatlar mamlakatlarimiz strategik sherikligining asosi bo‘lib xizmat qilayotgani qayd etilgan. Ushbu mustahkam poydevorga tayangan holda keyingi yillarda ikki tomonlama hamkorlikni rivojlantirishda sezilarli natijalarga erishilgan.
Hamkorlikning barcha sohalarida – iqtisodiyot, siyosat, parlamentlararo aloqalar, madaniyat va ijtimoiy sohada muvaffaqiyatlarga erishilmoqda. Barcha darajalarda faol muloqotlar, rasmiy delegatsiyalar, biznes va jamoatchilik vakillarining o‘zaro tashriflari davom ettirilmoqda. Keyingi yillarda, pandemiyaga qaramay, tovar ayirboshlash 4 karra oshdi. Joriy yil boshidan savdo 25 foizga oshdi. Ikki yuzdan ortiq qo‘shma korxona tashkil etilgan.
“O‘zbekiston va Ozarbayjon parlamentlari o‘rtasida yaqin va ko‘p qirrali sheriklik yo‘lga qo‘yilgani ham ushbu ijobiy natijalarga xizmat qildi. Buni yanada rivojlantirish uchun ikki mamlakat qonun chiqaruvchi organlarining tizimli va mustahkam aloqalarini mustahkamlash zarur. Ayni paytda parlamentlar O‘zbekiston va Ozarbayjon xalqlarining bevosita vakillari sifatida “xalq diplomatiyasini” ilgari surish, shu jumladan hududlar o‘rtasidagi aloqalarni mustahkamlash, iqtisodiy va gumanitar loyihalarni qo‘llab-quvvatlashda muhim o‘rin tutishlari kerak”, deyiladi xabarda
LiveBarchasi