Savdo urushi tufayli oltin rekord darajada qimmatladi

Oltin narxi yangi yuqori darajaga ko‘tarildi, chunki investorlar AQSH va Xitoy o‘rtasidagi savdo urushi oqibatlaridan xavotirga tushmoqda. Bu haqda BBC xabar berdi.

16 aprel kuni jonli bozorda oltin har bir unsiya uchun $3,357.40 ga yetdi, so‘ngra biroz pasaydi. Bu yil boshidan beri narx taxminan uchdan bir qismga oshgan.

Bu o‘sish AQSH Markaziy banki rahbari Jerom Pauellning izohlaridan so‘ng kuzatildi. Uning aytishicha, Prezident Donald Trampning tarif siyosati sekinroq iqtisodiy o‘sish, narxlarning oshishi va ishsizlik xavfini keltirib chiqarishi mumkin.

Qimmatbaho metall iqtisodiy beqarorlik paytida investorlar uchun xavfsiz aktiv sifatida qaraladi. 16 aprel kuni Chikagodagi Iqtisodiy klubda Jerom Pauell shunday dedi: 

“So‘nggi haftalarda e’lon qilingan kutilmagan yuqori tariflar AQSH iqtisodiy o‘sishini sekinlashtirishi va iste’molchilar uchun narxlarni oshirishi mumkin”.

Uning nutqi xalqaro moliya bozorlaridagi beqarorlik davridan keyin yangradi — investorlar yangi import bojlari va AQSH-Xitoy o‘rtasidagi kuchayib borayotgan savdo urushlariga javob qaytarmoqda.

SPI Asset Management kompaniyasining savdo va bozor strategiyasi bo‘yicha rahbari Stiven Innesning aytishicha, oltin to‘liq “qutqaruv qayig‘i” holatida, u dunyodagi eng ommaviy savdo aktiviga aylangan. 

“Dollar savdo siyosatining keskin o‘zgarishlari ostida larzaga kelmoqda va portfel boshqaruvchilari siyosiy yechimlarga ishonchni yo‘qotishdi”, deb qo‘shimcha qildi Innes.

Analitiklar bu yilgi oltin narxidagi o‘sishni 40 yildan ortiq avvalgi Eron inqilobi bilan solishtirishmoqda. O‘shanda, 1979 yil noyabrdan 1980 yil yanvargacha oltin narxi deyarli 120% ga oshgan edi.

Oltin ilk bor o‘tgan oyda har unsiya uchun $3,000 dan oshib o‘tdi, chunki global savdo urushi ta’siri haqidagi noaniqlik ortgan edi.

Tramp ma’muriyati tomonidan joriy etilgan bojlar — bu chet eldan mahsulot olib kiruvchi korxonalarga solingan soliqlar — inflyatsiya xavfini kuchaytirdi va investorlarni oltin kabi xavfsiz aktivlarga yo‘naltirdi. Tramp yanvarda Oq uyga qaytganidan beri Xitoyga 145% boj soliqlari joriy etdi, Xitoy esa javob tariqasida AQSH mahsulotlariga 125% boj soldi. Shuningdek, AQSHning boshqa ko‘plab davlatlarga nisbatan keng ko‘lamli bojlar joriy etiladimi-yo‘qmi — bu ham hozircha noaniq. Hukumat bu choralarni 90 kunga to‘xtatib qo‘ygan.

Tramp ma’muriyatining aytishicha, ushbu choralar ishlab chiqarishni AQSHga qaytarib, amerikalik ishchilar uchun ish o‘rinlari yaratadi va milliardlab dollarlik soliq tushumlarini ta’minlaydi.