Samarqand yovvoyi tabiat bo‘yicha muhim sammitga mezbonlik qiladi

Yovvoyi fauna va floraning yo‘qolib ketish xavfi ostida turgan turlari bilan xalqaro savdo to‘g‘risidagi konvensiya (CITES) Tomonlar konferensiyasining (COP20) 20-yig‘ilishi 24 noyabrdan 5 dekabrgacha Samarqandda bo‘lib o‘tadi. 

CITES Bosh kotibi Ivonn Igueroning so‘zlariga ko‘ra, bo‘lajak yig‘ilishda 185 mamlakatdan taxminan 3000 delegat ishtirok etishi kutilmoqda. Konferensiya Konvensiya tarixidagi eng yiriklaridan biri va 2025 yilning eng muhim va asosiy tabiatni muhofaza qilish tadbirlaridan biri bo‘ladi. Tadbir doirasida, shuningdek, CITES Doimiy qo‘mitasining 79 va 80-yig‘ilishlari ham bo‘lib o‘tadi. 

“Samarqand yovvoyi tabiatni muhofaza qilish bilan shug‘ullanadigan barcha shaxslar uchun markazga aylanadi. Bu yerda biz xalqaro savdoni qanday qilib mas’uliyatli va barqaror qilishni muhokama qilamiz. O‘zbekiston yashil rivojlanish yo‘nalishini tanlab, ekologik siyosat mamlakatning strategik taraqqiyotining bir qismi bo‘lishi mumkinligi haqida namuna ko‘rsatmoqda”, deydi Bosh kotib Ivonn Iguero. 

O‘zbekiston tomonining so‘zlariga ko‘ra, Samarqandda tadbirga keng ko‘lamli tayyorgarlik ishlari olib borilmoqda. Xususan, 110 dan ortiq ekspert seminarlari va ko‘rgazmalari, shuningdek, 114 ta masalani qamrab oluvchi tematik sessiyalar rejalashtirilgan. Shuningdek, Konvensiya qoidalarini yangilash bo‘yicha qariyb 150 ta hujjat loyihasi va 51 ta taklif tayyorlandi.

Forum ishtirokchilari Konvensiyani amalga oshirish mexanizmlarini takomillashtirish, noyob o‘simlik va hayvon turlarini himoya qilish, tabiiy resurslarni boshqarish va xalqaro hamkorlikni mustahkamlash masalalarini muhokama qilishlari kutilmoqda. 

CITES Konvensiyasi

Yovvoyi fauna va floraning yo‘qolib ketish xavfi ostida turgan turlari bilan xalqaro savdo to‘g‘risidagi Konvensiya (CITES) 1973 yilda Vashingtonda imzolangan xalqaro ko‘p tomonlama shartnoma bo‘lib, u 1975 yil 1 iyulda kuchga kirgan. CITES tarkibiga 184 ta davlat va Yevropa Ittifoqi kiradi. Har bir a’zo davlat Konvensiya qoidalariga rioya qilish va ro‘yxatga olingan turlarning eksporti, importi, reeksporti va dengizdan importini nazorat qilish majburiyatini oladi. O‘zbekiston Konvensiyaga 1997 yilda qo‘shilgan.