Rossiyalik jurnalist Kosovoda josus sifatida qo‘lga olindi 

Kecha, 6 avgustdan bugun, 7 avgustga o‘tar kechasi Kosovo politsiyasi rossiyalik jurnalist Darya Aslamovani josuslikda gumon qilib, hibsga oldi. Bu haqda Kosovo Ichki ishlar vaziri Jalol Svechliya ma’lum qilgan.

Qayd etilishicha, jurnalist “Komsomolskaya pravda” gazetasi muxbiri sifatida Kosovoga kirmoqchi bo‘lganida, Serbiya bilan chegarada qo‘lga olingan. 

Bugun, 7 avgust kuni ertalab Aslamova tahririyat bilan bog‘lanib, so‘roqdan keyin qo‘yib yuborilganini, ammo Kosovo hududini tark etib, Serbiyaga qaytishga majbur qilishganini aytgan. Shundan so‘ng, jurnalist chegaraga avtobusda o‘zi borgan. Serbiya chegarachilari ham uni so‘roq qilishgan.

Kosovo Ichki ishlar vazirligi rahbari o‘zining Facebook'dagi sahifasida shunday post qoldirgan:

“Ko‘plab davlatlar Aslamovaning Rossiya harbiy razvedkasi uchun josuslik bilan shug‘ullanganini va u o‘zini jurnalist sifatida ko‘rsatganini isbotladi... Uning Kosovoga kirishga urinishi Rossiyaning mamlakatimizni beqarorlashtirish maqsadida serb propagandasiga qo‘shilganini yaqqol isbotlaydi”.

Keyinchalik esa Ichki ishlar vaziri shunday deb yozgan:

“Mening qonuniy vakolatlarim doirasida, chet elliklar to‘g‘risidagi qonunga asoslanib, Darya Asmalovani Kosovo Respublikasida istalmaydigan shaxs deb e’lon qildim. Ushbu shaxsning Kosovo Respublikasi hududiga kirishi besh yil davomida taqiqlangan. Muayyan maqsadlar yoki ko‘rsatmalar bilan mamlakatimizni buzgan yoki beqarorlashtirishga intilayotgan har qanday kishi, shubhasiz, Kosovo Respublikasi qonunlarining kuchiga duch keladi”.

Jalol Svechliya, shuningdek Aslamovaning Rossiya Tashqi ishlar vaziri Sergey Lavrov, Iroqning sobiq diktatori Saddam Husayn va Suriya prezidenti Bashar al-Assad bilan birga tushgan suratlarini ham tarmoqqa joylashtirgan.

Aslamova – rossiyalik jurnalist, yozuvchi, radio boshlovchisi, “Komsomolskaya pravda” gazetasining maxsus muxbiri. U “Ahmoq qizning sarguzashtlari” kitobining muallifi sifatida ham tanilgan.