Ronaldu va Messi dunyoning eng kuchli futbolchilari emas – Gari Nevill

Hozirgi kunda, Krishtianu Ronaldu va Lionel Messi dunyoning eng kuchli futbolchilari emas. Ularning o‘yin saviyasi hanuz yuqori bo‘lsa-da, muxlislar jamoalarida Messi va Ronalduni ko‘rishni istamaydi, deb fikr bildirgan sobiq futbolchi va “Sky Sports” eksperti Gari Nevill. 

“Kichik qahramonliklar bo‘lishi mumkin. Lekin shubhasiz, Ronaldu va Messi o‘z kareralarini yakunlash arafasida. Bu bilan ularning ketishi mavsum oxirida sodir bo‘ladi demoqchi emasman. Ronaldu va Messining yana 3-4 yil o‘ynash ehtimoli bor. Chunki biz ularning jismoniy imkoniyatlarini bilamiz. Ikki buyuk futbolchining o‘yin darajasi bir joyda qotib qolgani haqida gapirish g‘alati tuyilishi mumkin. Sababi, oxirgi yillarda Messi va Ronalduning tenggi yo‘q edi. Biroq, ular endi u qadar kuchli emasligiga shubha yo‘q. Odamlardan sevimli klubi qaysi futbolchi bilan shartnoma imzolashni xohlashlarini so‘rasangiz, javob sifatida hech kimdan Messi yoki Ronaldu nomini eshitmaysiz. Hozirgi kunda, muxlislar Mbappe, Xoland, Saloh, Levandovski kabi futbolchilarni klublarida o‘ynashini istashadi. Bu ular hali ham eng yuqori saviyada o‘ynashsa-da, avvalgi darajasini yo‘qotayotganliklarining eng yaqqol misolidir. Lionel va Krishtianu endi dunyoning eng yaxshi futbolchilari emas”, degan “Manchester Yunayted”ning sobiq himoyachisi.

Ma’lumot o‘rnida, Ronaldu 2021 yilning yozida “Yuventus”dan 15 million yevro evaziga “Manchester Yunayted”ga qaytgan edi. Joriy mavsumda hujumchi APLning 23 ta uchrashuvida maydonga tushib, 9 ta gol urdi va 3 ta golli uzatmani amalga oshirdi. 

34 yoshli argentinalik futbolchi Lionel Messi joriy mavsumda PSJ bilan Liga 1 ning 16 ta o‘yinida maydonga tushib, 2 ta gol va 11 ta golli uzatmani amalga oshirdi. Budan tashqari, hujumchining hisobida Chempionlar ligasining 6 ta o‘yinida 5 ta gol ham bor.

Ma’ruf Abdumalikov