Ronaldu sotilmaydi – Erik ten Xag

Portugaliya terma jamoasi futbolchisi Krishtianu Ronaldu “Manchester Yunayted”ni tark etmaydi. Bu haqda “qizil iblislar” bosh murabbiyi Erik ten Xagning so‘zlariga tayanib, “Manchester Evening News” nashri xabar berdi.

“Ronaldu shaxsiy muammolar tufayli biz bilan emas. Ta’kidlashim joizki, bu mavsumdagi rejalarimizdan Krishtianu Ronaldu ham o‘rin olgan. Men u bilan ishlash imkoniyatini intiqlik bilan kutaman. Ronaldu “Yunayted”dan ketishi mumkinmi? U bu haqda menga aytmadi. Shu to‘g‘risidagi yangiliklarni o‘qidim, lekin aytganimdek, Krishtianu sotilmaydi. U bizning rejalarimizning bir qismidir. Birgalikda muvaffaqiyatga erishmoqchimiz. Ikkalamiz gaplashdik va bu juda yaxshi suhbat bo‘ldi”, degan “Manchester Yunayted” bosh murabbiyi.

Eslatib o‘tamiz, portugaliyalik futbolchi “Manchester Yunayted” bilan birgalikda Tailand va Avstraliya bo‘ylab yig‘inlarga jo‘nab ketmagan. Ommaviy axborot vositalari Ronalduning kelajagini “Barselona”, “Chelsi” va PSJ klublari bilan bog‘lamoqda.

Ma’lumot uchun, Ronaldu o‘tgan mavsumda “qizil iblislar” safida 38 ta o‘yinda maydonga tushib, 24 ta gol urishga erishgan. "Transfermarkt" portali portugaliyalik iqtidor egasini 35 million yevroga baholamoqda.

Ma’ruf Abdumalikov