YeCHL. “Atletiko” va “Siti” uchrashuvi katta mushtlashuv bilan yakunlandi (video)

“Atletiko” va “Manchester Siti” (0-1; 0-0) o‘rtasidagi Yevropa Chempionlar ligasining chorak final javob uchrashuvi mushtlashuv bilan tugadi. Bu haqda "Marca" nashri xabar berdi.

"Atletiko Madrid" va "Manchester Siti" o‘rtasidagi Chempionlar ligasining chorak final bahsiga hakam tomonidan qo‘shib berilgan vaqt 12 daqiqa davom etgan. Fil Fodenga qarshi qo‘pollik uchun Felipe Monteyro maydondan chetlatildi. Shuningdek, ikki jamoa o‘rtasida katta mushtlashuv sodir bo‘ldi. Natijada, Stefan Savich va Natan Ake ogohlantirildi.

Maydon tashqarisidagi Foden vaqtni behuda o‘tkazish uchun o‘yinga qaytdi. Savich uni payqab qoldi va yugurib borib, o‘z qo‘llari bilan Fodenni orqaga sudrab ketdi. Shundan so‘ng, katta janjal boshlandi.

Hakam kartochkalarni berishdan oldin futbolchilarning ajralishini kutdi. Fodenni tepgan Felipega qizil, Jek Grilish va Akening sochidan tortib olgan Savichga sariq ko‘rsatildi.

Mushtlashuv yakunlanib, hushtak chalinganidan keyin ham tartibsizlik davom etdi. “Siti” futbolchilari so‘nggi daqiqalarda vaqt cho‘zish uchun yerga yiqilishda davom etishdi. Natijada, Diyego Simeone Pep Gvardiolaning zaxira o‘rindig‘ini kinoya bilan olqishlab, “Estadio Wanda Metropolitano”ni “yondirib” yubordi. Buning ortidan, Savich, Mario Ermoso va Berta “shaharliklar” futbolchilari bilan yana bir bor to‘qnash kelishdi. Janjal davom etgach, UYeFA politsiyadan aralashishni so‘ragan.

Ma’lumot o‘rnida, kecha, 13 aprel kuni YeCHL chorak final bahslariga yakun yasaldi. “Atletiko” o‘z maydonida “Manchester Siti”ni qabul qildi. Ushbu bahsda hisob ochilmagan bo‘lsa-da, dastlabki o‘yindagi g‘alaba evaziga “Manchester Siti” yarim finalga yo‘l oldi. “Shaharliklar”ning yarim finaldagi raqibi Madridning “Real” klubi bo‘ladi. Ular o‘rtasidagi birinchi uchrashuv joriy yilning 26 aprel sanasiga belgilangan.

Shuningdek, javob uchrashuvida “Benfika” bilan jangovar 3-3 hisobida durrang qayd etgan “Liverpul” ham yarim finalga yo‘l oldi. “Qizillar” yarim finalda Ispaniyaning boshqa bir jamoasi “Vilyarreal” bilan kurash olib boradi. Ular o‘rtasidagi dastlabki uchrashuv 25 aprel kuni bo‘lib o‘tadi.

Ma’ruf Abdumalikov