Putin Prezidentligi uchun Qorboboga minnatdorlik bildirdi

Rossiya Prezidenti Vladimir Putin buyuk ustyuglik Qorboboga advokat bo‘lishga tayyorligini ma’lum qildi va u bilan munosabatlari haqida gapirdi. Bu haqda Prezident an’anaviy matbuot anjumanida aytib o‘tgan.

Gap shundaki, tadbirda Vologda viloyati gazetalaridan birining vakili Putinga murojaat qilgan. U Sankt-Peterburgda yashovchi, malakasi bo‘yicha advokat Buyuk Ustyugdan bo‘lgan Qorboboni “istaklarini 23 yildan buyon bajarmayotgani uchun” sudga berganini ma’lum qilgan. Shuningdek, jurnalist Prezidentdan rossiyaliklarning “xayp”ga berilayotganiga munosabatini so‘ragan.

“Bu sankt-peterburglik advokat, voyaga yetgan. Men ham Sankt-Peterburglik yuristman, bizda ba’zi o‘xshashliklar bor. Bu borada men shunday javob beraman: men ham advokatman, shuning uchun men Qorboboning advokati sifatida ishlay olaman. Da’vogarga Qorbobo tilak va sovg‘alarni faqat yaxshi o‘g‘il-qizlarga berishini eslatishim mumkin. U o‘zining xatti-harakatlarini tahlil qilsin va, ehtimol, Qorbobo unga nega sovg‘a bermayotgani sababini topar”, degan Putin tabassum bilan.

Rossiya rahbari “xayp” haqida gapirar ekan, agar u biror yaxshi hazilning bir qismi bo‘lsa, unda hech qanday yomonlik yo‘qligini ta’kidlagan.

Shuningdek, tadbir davomida Prezidentdan Qorbobo uning xohish-istaklariga qanday javob qaytarayotgani haqida so‘ralgan.

“Mening Qorbobo bilan munosabatlarim shu paytgacha yaxshi ko‘rinishda rivojlanib bormoqda va men siz bilan bugun o‘zim bo‘lgan maqomda uchrasha olganim uchun ulardan minnatdorman. Buning uchun menga ushbu yuksak lavozimni ishonib topshirgan Rossiya Federatsiyasi xalqidan yanada minnatdorman”, deydi davlat rahbari jiddiy ohangga o‘tib.