Putin Markaziy Osiyoga yagona energetika tizimini tiklashni va’da qildi
Olam
−
14 Oktabr 2022
10760Rossiya Markaziy Osiyoning yagona energetika tizimini tiklashda amaliy yordam berishga tayyor. Bu haqda Rossiya Prezidenti Vladimir Putin Ostonada o‘tgan Rossiya-Markaziy Osiyo birinchi sammitida ma’lum qildi.
“Rossiya va Markaziy Osiyo mamlakatlari o‘rtasida energiya xavfsizligi sohasida hamkorlik chuqurlashmoqda. Gap ishlab chiqarish quvvatlarini yaratish, atom elektr stansiyalarini qurish, raqamli texnologiyalarni joriy etish bo‘yicha hamkorlik haqida bormoqda. Xususan, mamlakatimiz Markaziy Osiyoning yagona energetika tizimini tiklashda amaliy yordam ko‘rsatishga tayyor. Bu albatta, mintaqadagi barcha davlatlarning energetik xavfsizligini oshiradi”, deydi u.
Putinning so‘zlariga ko‘ra, neftni tashish yo‘nalishlarini kengaytirish, Kaspiy dengizidagi energiya resurslarini birgalikda o‘zlashtirish, shuningdek, arzon va toza gazli motor yoqilg‘isi bilan ta’minlash, quvurlarni qurish va kengaytirish, ko‘mir savdosini ko‘paytirish va uni Osiyo bozorlariga tashish kabi sohalarda ham istiqbollar rejalashtirilmoqda.
Rossiya tomonidan olib borilayotgan eksport va importni qayta yo‘naltirish Buyuk Evrosiyoning butun makonida transport koridorlarining rivojlanishini rag‘batlantiradi, deya qo‘shimcha qildi Rossiya Federatsiyasi Prezidenti. Shu munosabat bilan, Markaziy Osiyo “beshlik” mamlakatlari hududidan o‘tadigan yangi Trans - Yevroosiyo Sharqiy - G‘arbiy, Shimoliy - Janubiy, Yevropa-G‘arbiy Xitoy yo‘nalishlarini tashkil etish asosiy vazifa hisoblanadi.
“Axborot texnologiyalarini joriy etish va sun’iy intellektdan foydalanish, shuningdek, yuk va yuklarni uzluksiz tashish uchun chegara punktlarini rivojlantirish yuk oqimini sezilarli darajada tezlashtirishi mumkin”, deya xulosa qildi Putin.
Temur Jumayev
LiveBarchasi