Putin Lukashenkoni tavallud kuni bilan tabrikladi
Olam
−
30 avgust 2021 3806
Bugun, 30 avgust kuni Rossiya Prezidenti Vladimir Putin Belarus Prezidenti Aleksandr Lukashenkoga qo‘ng‘iroq qilib, uni tug‘ilgan kuni bilan tabrikladi. Bu haqda Kreml Matbuot xizmati xabar berdi.
Qayd etilishicha, ikki davlat rahbarlarining telefon orqali suhbatidan oldin Putin Lukashenkoga tabrik telegrammasini yuborgan.
“Telefon suhbati chog‘ida Rossiya Prezidenti Vladimir Putin Belarus Respublikasi Prezidenti Aleksandr Lukashenkoni tug‘ilgan kuni bilan samimiy tabrikladi. Ikki tomonlama hamkorlikning ayrim masalalari va turli formatdagi bo‘lajak aloqalar muhokama qilindi”, deyiladi xabarda.
Belarus Prezidenti Matbuot xizmatining ma’lum qilishicha, Aleksandr Lukashenkoni Rossiya rahbaridan avval Tojikiston Prezidenti Imomali Rahmon tabriklagan. Shuningdek, Belarus yetakchisining O‘zbekiston Prezidenti Shavkat Mirziyoyev bilan ham telefon suhbati rejalashtirilgan.
Ma’lumot uchun, bugun 67 yoshni qarshilagan Aleksandr Lukashenko 1954 yilning 30 avgust kuni Belarus SSRning Vitebsk viloyatida tug‘ilgan. U 1994 yildan beri Belarusni boshqaradi. Lukashenko shu vaqtga qadar o‘tkazilgan mamlakat prezidentligi uchun barcha saylovlarda (5 marta) g‘alaba qozongan.
Live
Barchasi