Prezident To‘raqo‘rg‘onda “mahalladagi vakili” pora bilan ushlanib, qamalganini aytdi

Namangan viloyatining To‘raqo‘rg‘on tumani “Sharq” mahallasidagi hokim yordamchisi imtiyozli kreditga tavsiya berish uchun “pora” olayotganda ushlanib, 5 yilga ozodlikdan mahrum etildi. Bu haqda bugun, 19 aprel kuni bo‘lib o‘tgan videoselektor yig‘ilishida O‘zbekiston Prezidenti Shavkat Mirziyoyev so‘z ochdi.

“Joylardagi ayrim hokim yordamchilari “kredit, subsidiya, yer olib beraman”, deb tamagirlik qilayotgani juda achinarli holatdir. Misol uchun, To‘raqo‘rg‘on tumani “Sharq” mahallasidagi hokim yordamchisi imtiyozli kreditga tavsiya berish uchun “pora” olayotganda ushlanib, 5 yilga ozodlikdan mahrum etildi”, deydi Prezident.

Mirziyoyevga ko‘ra, bu kabi holatlar Mirzo Ulug‘bek, Yunusobod, Bo‘ka, Baxmal tumanlari, Marg‘ilon, Shirin shaharlarida ham mavjud.

“Barcha viloyat, tuman va shahar hokimlari, ularning birinchi o‘rinbosarlari, respublika vakillari, Ubaydullayev va uning quyi tizimi rahbarlarini qat’iy ogohlantiraman. Odamlarni rozi qilish va inson qadrini tushunmagan rahbarlarga oramizda o‘rin bo‘lmaydi”, deydi davlat rahbari.

Yig‘ilishda, viloyat, tuman va shahar hokimlari oldiga “qoniqarsiz” deb baholangan 3 ming 636 nafar mahallaga shaxsan borish va muammolarni hal qilish vazifasi qo‘yildi. Iqtisodiy taraqqiyot vazirligiga viloyat hokimlari bilan birgalikda ushbu mahallalar kesimida muammolarni hal qilish bo‘yicha “yo‘l xaritalari”ni ishlab chiqish topshirildi. Bunda, yil yakuniga qadar: 

•  434 ta mahallada sug‘orish tizimi va suv ta’minotini yaxshilash;

•  715 ta mahallada suv, yo‘l, elektr, tabiiy gazdan muammosini hal qilish;

•  iqtisodiy ahvoli og‘ir 545 ta mahalladan har 5 tasiga bank vakilini biriktirib, “lider” tadbirkorlarni topish shartligi ko‘rsatib o‘tildi.

Moliya vazirligi ushbu mahallalarda infratuzilmani yaxshilash va tadbirkorlik kreditlari uchun 800 milliard so‘m ajratadi.

“Qanchalik qiyin bo‘lmasin, ushbu mahallalarda ishlarning yurishi uchun shuncha qo‘shimcha mablag‘larni ajratyapmiz. Viloyat, tuman va shahar hokimlari, biriktirilgan vakillar va hokim yordamchilari ushbu mablag‘larning har bir so‘midan samarali foydalanib, aniq natija ko‘rsatishi kerak”, deya ta’kidladi Prezident.