Pistorius Kiyevga bordi

Germaniya Mudofaa vaziri Boris Pistorius bugun, 14 yanvar kuni  Ukraina rahbariyati bilan Rossiya bosqinini qaytarishda keyingi harbiy yordam ko‘rsatish bo‘yicha muzokaralar o‘tkazish uchun Kiyevga bordi. Bu haqda “Deutsche Welle” xabar berdi.

“Ushbu safar bilan biz Ukrainani faol qo‘llab-quvvatlayotganimizni ko‘rsatishimiz juda muhim, bu Germaniya NATOning Yevropadagi eng yirik davlati sifatida yolg‘iz emas, balki besh davlat bilan birga Ukraina tomonida ekanligidan dalolat beradi”, degan u Kiyevda bergan intervyusida.

Pistorius Varshavada Polsha, Fransiya, Italiya va Buyuk Britaniyadan kelgan mavqedoshlari bilan Kiyevga keyingi yordam bo‘yicha muzokaralar o‘tkazdi. Germaniya Yevropaning to‘rtta yirik hamkori bilan birgalikda Ukraina mudofaa sanoatini mustahkamlash bo‘yicha sa’y-harakatlarni kuchaytirish niyatida.

“Agar pul bo‘lsa, qurol ishlab chiqarish quvvati bo‘lsa, Ukrainaning o‘zi o‘z qo‘shinlarini juda tez materiallar va qurollar bilan ta’minlaydi”, degan Pistorius Varshavadagi uchrashuvda.

Yevropa Mudofaa vazirlarining P5 formatidagi maslahatlashuvlari AQSHdagi prezidentlik saylovida Donald Tramp g‘alaba qozonganidan so‘ng Yevropa xavfsizligi va mudofaa salohiyatini mustahkamlash maqsadida tashkil etildi.

Tramp inauguratsiyasi oldidan G‘arbning Ukrainani qo‘llab-quvvatlashi ortidan nima bo‘lishi noma’lumligicha qolmoqda. Tramp Ukrainadagi urushni imkon qadar tezroq tugatish uchun Rossiya Prezidenti Vladimir Putin bilan muzokara olib borish istagi haqida bir necha bor gapirgan, biroq Yevropa ittifoqchilari uning aniq rejalaridan xabardor emas. Ukrainada ular Tramp AQSH yordamini sezilarli darajada kamaytirishi mumkinligidan qo‘rqadi, bu esa ularning nazdida Kiyevning urushdagi mag‘lubiyatiga olib keladi.

Ukrainani qo‘llab-quvvatlash borasida noaniqlik Ukrainaga Yevropaning eng yirik qurol yetkazib beruvchisi bo‘lgan Germaniyada ham saqlanib qolmoqda. 2024 yilning oxirida mamlakatni tasdiqlangan byudjetsiz qoldirgan hukumat koalitsiyasining qulashi bu holatning sabablaridan biri bo‘ldi.

Eslatib o‘tamiz, kecha, 13 yanvar kuni Germaniya Mudofaa vaziri Boris Pistorius Ukrainaga mamlakatning artilleriya salohiyatini mustahkamlash uchun birinchi yangi g‘ildirakli RCH 155 gaubitsasini topshirgandi. Ukrainaning Germaniyadagi elchisi Aleksey Makeyev tadbirda Kiyevga ko‘chirilishi rejalashtirilgan ushbu gaubitsaning birinchisini ramziy ravishda qabul qilib olgan. Birinchi oltita bunday tizim dastlab Germaniyada qoladi va ukrainalik harbiy xizmatchilarni tayyorlash uchun ishlatiladi.