Pandemiyada Rossiyada qolib ketganlarni qaytarish uchun maxsus reyslar yo‘lga qo‘yildi

Pandemiya davrida Rossiyada qolib ketgan O‘zbekiston fuqarolariga vataniga qaytishi uchun “O‘zbekiston temir yo‘llari” aksiyadorlik jamiyati tomonidan 5 ta maxsus reys yo‘lga qo‘yiladi. Bu haqda “O‘ztemiryo‘lyo‘lovchi” AJ Matbuot xizmati xabar berdi. 

Qayd etilishicha, 5 ta maxsus reys “Voljskiy-Toshkent” yo‘nalishida 483-sonli yo‘lovchi poyezdi orqali amalga oshiriladi. 

Xabarga ko‘ra, mazkur poyezdlar joriy yilning 15, 19, 22, 26,29 noyabr kunlari soat 20:57 da harakatni amalga oshiradi. Poyezdlarga faqat bir tomonga, ya’ni “Voljskiy-Toshkent” yo‘nalishiga chiptalar sotiladi. Chiptalarni elektron tarzda ham sotish yo‘lga qo‘yilgan. 

“Rossiyadagi yurtdoshlarimizning yaqinlari O‘zbekistonda turib, ularning shaxsini tasdiqlovchi hujjati nusxasi bilan “O‘zbekiston temir yo‘llari” aksiyadorlik jamiyati veb-sayti orqali e-ticket.railway.uz dan chiptalarni elektron tarzda xarid qilib olib, jo‘natishlari ham mumkin”, deyiladi xabarda. 

Qo‘shimcha ma’lumotlarni Toshkent shahrida 1005 qisqa telefon raqami, joylardagi temir yo‘l kassalari hamda ma’lumotlar byurosidan bilib olish mumkin.