Aholining dollarga talabi keskin ortdi. Valyuta oldi-sotdisida cheklovlar bo‘ladimi?

O‘zbekistonda aholining dollarga bo‘lgan talabi mart-aprel oylarida keskin oshib ketdi. Bu haqda bugun, 15 aprel kuni Markaziy bank raisi Mamarizo Nurmuratov brifing vaqtida ma’lum qildi.

“Aholi tomonidan mart oyida o‘rtacha kunlik 13,3 million dollarlik valyuta sotib olingan bo‘lsa, aprel oyining ikkinchi o‘n kunligidan boshlab bu summa keskin oshdi va 10 aprelda 19,5 million dollarni tashkil etdi, 13 aprel kuni esa 22 million dollarga yetdi.

Shu bilan birga 15 aprel kuni valyuta birjasida talab darajasi 62 million AQSH dollarini va 16 million yevrodan ortiqni tashkil etgan bo‘lsa, almashuv kursining 10 121 so‘mgacha oshishi valyuta sotib olish bo‘yicha arizalarning katta qismi, qariyb 80 foizini qaytarib olinishiga sabab bo‘ldi. Avvalgi kunlarda bunday holat kuzatilmagan edi”, dedi Nurmuratov.

Markaziy bank raisi valyuta oldi-sottisiga hech qanday cheklovlar kiritilmasligini aytib o‘tdi.

"Bugungi kundagi valyuta bozoridagi holat almashuv kursining o‘zining tabiiy nuqtasiga yaqinlashganidan dalolat beradi. Oxirgi paytlarda ijtimoiy tarmoqlarda valyuta oldi-sotdisi bilan bog‘liq cheklovlar kiritilishi bo‘yicha turli xabarlar paydo bo‘lmoqda.

Fursatdan foydalanib ta’kidlab o‘tmoqchimanki, valyuta sotish va sotib olish bo‘yicha hech qanday cheklovlar kiritilmaydi. Faqat uning narxi bozordagi omillar asosida shakllanib boradi", dedi Mamarizo Nurmuratov.

Eslatib o‘tamiz, kecha Markaziy bank qayta moliyalash stavkasini 1 bandga pasaytirib, 15 foiz qilib belgiladi. Bu mamlakatda inflyatsiya darajasi bo‘yicha prognozning pasayishi bilan izohlandi.