“Oskar-2023” g‘oliblari taqdirlandi (fotoreportaj)

Kecha, 12 mart kuni Amerika Qo‘shma Shtatlarining Los-Anjeles shahrida Amerika kinematografiya akademiyasining “Oskar” mukofotini topshirish marosimi bo‘lib o‘tdi. Tantanali marosim ABC telekanalidan efirga uzatildi.

Qayd etilishicha, “Oskar” mukofotining bu galgi tanlovida qatnashish uchun arizalar berish jarayoni 2022 yilning noyabrida boshlangan. Joriy yilning 7 martida esa ovoz berish yakunlangan.

Ishtirokchilar 23 ta yo‘nalish bo‘yicha taqdirlangan. Eng yaxshi film nominatsiyasida “Hamma joyda hamma narsa bir vaqtning o‘zida” (“Everything everywhere all at once”) kinokartinasi g‘olib deb topildi. Brendon Freyzer esa “Kit” (“Whale”) filmidagi Charli obrazi uchun yilning eng yaxshi erkak aktyori deya tan olingan. Eng yaxshi aktrisa esa Mishel Yeo bo‘lgan.

Shuningdek, kanadalik kinoijodkorlar tomonidan ishlangan “Navalniy” kinoasari eng yaxshi hujjatli film deb topilgan. Mazkur filmda rossiyalik muxolifatchi Aleksey Navalniyning 2020-2021 yillardagi hayoti haqida hikoya qilingan. Taqdirlash marosimida Navalniyning turmush o‘rtog‘i Yuliya Navalnaya so‘zga chiqib, erining ozodlikka chiqishidan umidvor ekanini bildirgan.