OKMKning OCHLda o‘ynaydigan tarkibi ma’lum bo‘ldi

Olmaliqning OKMK klubi Osiyo Chempionlar ligasi uchun qaydnomasini e’lon qildi. 

“C” guruhidan joy olgan Mirjalol Qosimov shogirdlariga Saudiya Arabistonining “Al-Ittihod”, Eronning “Sepahon” va Iroqning “Eyr-Fors” jamoalari raqiblik qiladi.

“OKMK futbol klubi tarkibda guruh bosqichi uchrashuvlari uchun o‘zgartirishlar kiritdi. Saralash uchrashuvlariga jamoamiz ro‘yxatida bo‘lgan va keyinchalik boshqa jamoalarga yo‘l olgan Nodirbek Abdurazzoqov va Abdulla Abdullayev ro‘yxatdan chiqarilgan bo‘lsa, yaqindagina jamoamiz safiga erkin agent maqomida kelgan Baxtiyor Qosimov guruh bosqichi doirasida OKMK sharafini himoya qilish imkoniyatiga ega bo‘ldi. Shuningdek, yoshlar tarkibidan Aslbek Umirzoqov va Sirojiddin Bashriddinov Chempionlar ligasi qaydnomasiga kiritildi”, deyiladi klub matbuot xizmati xabarida. 

OCHL guruh bosqichi 1-turi doirasida OKMK Jidda shahrida Saudiya Arabistonining “Al-Ittihod” jamoasi mehmoni bo‘ladi.

O‘yin 18 sentyabr kuni, Jiddadagi “Qirol Abdulloh Sport Siti” stadionida mahalliy vaqt bilan 19:00 da, O‘zbekiston vaqti bilan esa 21:00 da boshlanadi.