Noruda materiallarni qazib olish bo‘yicha moratoriy tatbiq etilgan hududlar chegarasi belgilandi

Noruda materiallarni qazib olish bo‘yicha moratoriy tatbiq etilgan hududlarning chegaralari belgilandi. Bu haqda joriy yilning 12 sentyabr kuni qabul qilingan hukumat qarorida so‘z boradi.

Qaror bilan Chirchiq, Sirdaryo, Sangzor, Zarafshon, Norin, Qashqadaryo va Surxondaryo daryolari o‘zanlaridagi noruda materiallarni qazib olishga muddatsiz moratoriy joriy etiladigan hududlar chegaralari tasdiqlandi. Bunda moratoriy tatbiq etiladigan daryolar hududlari chegaralariga daryo o‘zanlari, ularning sohilbo‘yi mintaqalari va suvni muhofaza qilish zonalari kiradi.

Tegishli tashkilot va hokimliklar:

• daryolarning moratoriy tatbiq etilishi belgilangan hududlarida daryo o‘zanlarini tozalash va noruda materiallarini qazib olish ishlari to‘xtatilishini qat’iy nazoratga oladi;
• daryo o‘zani, sohilbo‘yi mintaqalari va suvni muhofaza qilish zonalarida noruda materiallarni noqonuniy qazib olishning oldini olish bo‘yicha nazorat tadbirlari kuchaytiriladi hamda joriy qilingan moratoriyni buzishga oid huquqbuzarlik holatlari yuzasidan qonunchilikda belgilangan tartibda choralar ko‘rilishini ta’minlaydi.

Daryolarning moratoriy tatbiq etilishi belgilangan hududlarda joylashgan qum-shag‘al qazib oluvchi hamda qayta ishlovchi tadbirkorlar tog‘ va tog‘oldi hududlarga yoki ushbu hududlarning yaqinida joylashgan kichik sanoat zonalariga ko‘chirish choralari ko‘riladi.

Ko‘chirilayotgan tadbirkorlarga noruda materiallarini o‘z ichiga olgan yer qa’ri uchastkalaridan foydalanish huquqi “E-auksion” orqali rasmiylashtirib beriladi.

Ma’lumot uchun, Prezident farmoniga muvofiq, yuqoridagi daryolar o‘zanlaridagi noruda materiallarni qazib olishga muddatsiz moratoriy joriy etilgan.