Neymar “Santos”ga qaytadimi?

Braziliyaning “Santos” klubi hozirda sobiq futbolchisi Neymar bilan muzokara olib bormayapti. Bu haqda klub ijrochi direktori Marsio Kalves ma’lum qildi.

32 yoshli futbolchi Neymar hozirda Saudiya Arabistonining “Al-Hilol” jamoasida to‘p suradi.

“Neymar bilan rasmiy muzokaralar olib bormayapmiz, ammo har bir muxlis uning klubga qaytishini orzu qiladi. “Santos” Neymar bilan ajoyib munosabatda. Faoliyatini shu yerda boshlagan va qaytish ehtimoli uning “Al-Hilol”dagi ishtiyoqi va o‘yiniga bog‘liq. 60 foiz ishonamanki, Neymar “Al-Hilol” bilan shartnomasi yakunlangach, safimizga qo‘shiladi. U qaytishga rozi bo‘lishi mumkin, chunki u “Santos”ni yaxshi ko‘radi va 2026 yilgi Jahon chempionati haqida o‘ylayapti”, deydi Kalves.

Ma’lumot uchun, Neymar 2009 yildan 2013 yilgacha “Santos” safida to‘p tepib, 102 ta o‘yinda maydonga tushgan va 54 marta raqiblar darvozasini ishg‘ol qilgan. 2013 yilda futbolchi “Santos”ni tark etib, “Barselona” safiga borib qo‘shilgan.