NATO tilga kirdi. Ukrainaga qurol yetkazib beriladi va Rossiya chegarasiga katta qo‘shin kiritiladi

north_east

Belgiya Ukrainaga qurol yetkazib bermoqchi

Kecha, 25 fevral kuni NATO Bosh kotibi Yens Stoltenberg Rossiya bosqini ortidan yuzaga kelgan xavf sababli Ukrainaga chegaradosh mamlakatlarga katta qo‘shin kiritilishi haqida ma’lum qildi. Bundan tashqari, u Ukrainaga NATO tomonidan ham quruqlik, ham havo mudofasini ta’minlash uchun zaruriy qurol-yaroq yetkazib berilishini qo‘shimcha qilgan. 

Stoltenbergning ta’kidlashicha, NATO quruqlik, havo, dengiz va maxsus operatsiya kuchlaridan iborat tezkor javob harbiy qismlarni alyansga ittifoqdosh hududlarga joylashtirmoqda.

Bosh kotibga ko‘ra, NATOga a’zo 30 ta davlat Ukrainaga o‘z mudofasini ta’minlash uchun eng zamonaviy qurol-yaroq yetkazib berishga kelishib olgan. Ammo NATO rahbari Ukrainaga aynan qaysi turdagi harbiy texnikalar yetkazib berilishini ochiqlamagan. 

“Ittifoqchilar Ukrainaga yordamni davom ettirishga sodiq qoladilar. Biz NATOning javob kuchlarini birinchi marta kollektiv mudofaa hududi bo‘ylab joylashtirmoqdamiz. Hech qanday tushunmovchilik yoki noto‘g‘ri hisob-kitoblarga o‘rin bo‘lmaydi. Biz alyansga a’zo har bir ittifoqchining xavfsizligini ta’minlash va NATO hududining har bir qarich yerini himoya qilish uchun qo‘limizdan kelgan barcha narsani qilamiz”, degan Stoltenberg.

Bundan tashqari, u Rossiyani Ukrainadagi hokimiyatni ag‘darishga urinishda ayblagan. 

“Biz xabarlarda ritorikani ko‘ryapmiz, bu esa hujumdan maqsad Kiyevda demokratik yo‘l bilan saylangan hukumatni ag‘darish ekanligini ko‘rsatmoqda”, deya bildirgan Stoltenberg.

Unga ko‘ra, Ukraina bilan chegaradosh hududlar bo‘ylab, hozirda Fransiya tomoni yetakchilik qilayotgan NATOning juda yuqori tayyorgarlikdagi qo‘shma harbiy guruhidan 40 000 askar joylashtiriladi. 

Qo‘shinlarning asosiy qismi Rossiya va Ukrainaga chegaradosh Estoniya hamda Bolgariyaning Qora dengiz qirg‘oqlari bo‘ylab joylashtirilishi ma’lum qilingan.