“Nasaf” murabbiyi Ro‘ziqul Berdiyevning akkreditatsiyasi olib qo‘yildi. Nega?

O‘zbekiston Superligasining 17-turidan o‘rin olgan “Nasaf” – “Lokomotiv” uchrashuvi yakuniga etgach mezbonlar ustozi Ro‘ziqul Berdiyev hakamlar joy olgan maydon markaziga qarab borib, ularga nisbatan nomaqbul harakatlarni amalga oshirgani uchun vaqtinchalik akkreditatsiyasi olib qo‘yildi. Bu haqda O‘zPFL matbuot xizmati xabar berdi.

Uchrashuv yakuniga yetgach mazkur masala yuzasidan bosh hakam Ahrol Risqullayev hamda O‘zPFL komissari bildirgi taqdim etgan. Unda qayd etilishicha, uchrashuv yakuniga yetishi bilan “Nasaf” futbol klubining qator futbolchilari hamda bosh murabbiy Ro‘ziqul Berdiyev hakamlar brigadasini o‘rab olgan. Bu vaqtda bosh murabbiy bosh hakam libosini qo‘pol tarzda tortgan hamda uning qorin qismiga zarba bergan. Shundan kelib chiqib, O‘zPFL Ro‘ziqul Berdiyevga berilgan akkreditatsiyani tegishli qo‘mitalar mazkur vaziyatni o‘rganib chiqquniga qadar qaytib oldi. Bosh murabbiy O‘zbekiston kubogining chorak finali doirasida “Lokomotiv”ga qarshi uchrashuv qaydnomasiga kiritilmaydi.

Chempionatning 18-turini o‘tkazish uchun “Nasaf” 10 sentyabr kuni Olmaliq shahriga tashrif buyuradi. Shundan kelib chiqib, O‘zPFL tegishli qo‘mitalar ishtirokidagi yig‘ilishni 9 sentyabr kuni o‘tkazish taklifini O‘FAga kiritdi. Bunda qaror bir tomonlama ko‘rib chiqilmasligini ta’minlash maqsadida qo‘mitalar yig‘ilishiga Ro‘ziqul Berdiyev va Ahrol Risqullayevning o‘zi ham taklif etilishi ko‘zda tutilgan.

Bayram sababli dam olish kunlarining avvaldan belgilab qo‘yilgani, shuningdek, “Nasaf” ustozining Toshkentga kelishida muammo yuzaga kelmasligini ta’minlash maqsadida 8 sentyabr sanasi tanlab olindi. Berdiyevning akkreditatsiyasini qaytarish masalasi qo‘mitalar qaroridan keyin hal etiladi.    

Ma’lumot uchun, hakamlar qaroriga shikoyat berish tartibi Reglamentning 14-bobida batafsil tushuntirib o‘tilgan. Garchi “Nasaf” jamoasi hakamlar brigadasiga etika normalariga zid ravishda e’tiroz bildirgan bo‘lsa-da, klub 14-bob bo‘yicha rasmiy e’tiroz bilan chiqmagan.

Ma’lumot uchun, “Nasaf” – “Lokomotiv” bahsining yakunida temiryo‘lchilar futbolchisi Kaxi Maxaradzening qo‘liga to‘p tegib ketdi. Lekin, bosh hakam qo‘l tabiiy holatda deb topdi va VAR tizimidan foydalanmadi. O‘yin yakuniga yetganidan so‘ng maydonda “Nasaf” futbolchilari va murabbiylari hakamlar brigadasiga norozilik bildirishdi. Uchrashuv durrang natija bilan yakuniga yetgan.

Ibrohim Davronov