NASA kosmosdan Ukrainaning zulmatda qolgani tasvirini e’lon qildi

Amerikaning NASA kosmik agentligi sun’iy yo‘ldosh orqali Ukrainaning to‘liq zulmatda qolgani tasvirini e’lon qildi.

Bu mamlakat butunlay zulmatga cho‘mganini ko‘rsatadi. Ukraina hududi 24 noyabrga o‘tar kechasi koinotdan olingan suratda qo‘shni davlatlar, jumladan, Rossiyaning yorqin yoritilgan shahar va qishloqlari bilan o‘ralgan holda namoyish qilingan.

Ukraina Prezidenti Vladimir Zelenskiy energetika sohasidagi vaziyat murakkab ekanligini ta’kidlagan. Ukrainaning deyarli barcha hududlarida elektr ta’minoti bilan bog‘liq jiddiy muammolar davom etmoqda. 15 ta hududda suv ta’minotida muammolar mavjud.

Ukraina rahbarining so‘zlariga ko‘ra, olti milliondan ortiq odam elektrsiz qolmoqda. DTEK energetika xoldingi bosh direktori Aleksandr Fomenkoning aytishicha, Kiyev elektr energiyasi bilan atigi 30 foizga ta’minlangan. Uning qayd etishicha, Ukraina poytaxtidagi uylarda elektr quvvati sakkiz soatlik tanaffus bilan uch-to‘rt soatga yoqilgan.

Avvalroq Rossiya Ukrainaning energetika infratuzilmasiga yana raketa zarbalari bergani haqida xabar berilgandi.

Sohiba Komilovna