Moskva metrosini portlatmoqchi bo‘lgan shaxs ushlandi

Rossiya poytaxti Moskva metrosini portlatib, shahardagi yahudiylar ibodatxonasida teraktlar uyushtirishni rejalashtirgan shaxs Federal xavfsizlik xizmati (FXX)xodimlari tomonidan to‘xtatildi. Bu haqda TASS xabar berdi.

FXX  ma’lumotlariga ko‘ra, ushbu shaxs apparat do‘konlaridan portlovchi moddalar uchun materiallar sotib olgan. Uning uyini tintuv qilish chog‘ida qo‘lbola portlovchi moddalar uchun butlovchi qismlar, jumladan alyuminiy kukuni, ammiakli selitra, atseton va gidroperit moddalari topilgan. Bundan tashqari, gumonlanuvchi bomba yasashda chiqadigan zararli moddalardan  himoya vositalarini sotib olgan.

Xabarda aytilishicha, erkak telefon orqali arab tilida portlovchi moslamani yig‘ish bo‘yicha ko‘rsatmalar olib kelgan va uning telefonidan ISHIDga aloqador dalillar topilgan.

Federal xavfsizlik xizmati matbuot xizmatining ma’lum qilishicha, Markaziy Osiyo davlatlaridan birining fuqarosi bo‘lgan ushbu shaxs poytaxt metrosida va Moskva viloyatidagi yahudiy muassasalaridan birida portlovchi moddalarni portlatishni rejalashtirgan. 

“U terrorchilik harakatini amalga oshirgach, Afg‘onistonga borib , xalqaro terrorchilik tashkiloti safiga qo‘shilishni rejalashtirgan. Voqea yuzasidan “Teraktga tayyorgarlik ko‘rish va terrorchilik tashkiloti faoliyatida ishtirok etish”  moddasi bo‘yicha jinoiy ish qo‘zg‘atilgan”, deyiladi xabarda.

Eslatib o‘tamiz, 2024 yil 22 mart kuni kechqurun Moskva yaqinidagi Krasnogorsk shahrida joylashgan “Krokus Siti Holl” konsert zalida konsert oldidan  sodir etilgan terakt yuzasidan tergov yakunlanganligi haqida xabar berilgan edi.

Bunyod Keldiboyev