MLSning rasmiy sahifasi Buskets bilan Arbeloani adashtirib yubordi

Ispaniyalik futbolchi Serxio Buskets AQSHning “Inter Mayami” klubiga o‘tganidan so‘ng, MLSning rasmiy kanalida Buskets surati o‘rniga boshqa bir ispaniyalik futbolchi Alvaro Arbeloaning surati e’lon qilindi.

Bu bilan mahalliy mutaxassislarning Yevropa futbolidan ancha uzoqdaligi bilinib qoldi. Xato ketgan posterni ko‘rgan ijtimoiy tarmoq foydalanuvchilari sahifani kinoyalarga to‘ldirganidan keyingina administrator xatosini tushunib, posterni to‘g‘irladi.

Ba’zi futbol jurnalistlari ayrim fotosuratlarda Buskets va Arbeloa haqiqatan ham bir-biriga o‘xshashini aytmoqda. Arbeloa va Buskets ancha vaqt Ispaniya terma jamoasida to‘p surgan va ular o‘zining gullagan davrida “qizil furiya” bilan yirik turnirlarda qatorasiga uch marta g‘alaba qozongan.

Eslatib o‘tamiz, futbolchi iyun oyi oxirlarida “Inter Mayami” klubi bilan shartnoma imzolagan edi. Buskets shu yozda “Barselona”ni tark etdi. U “Inter Mayami”ga erkin agent sifatida qo‘shildi. Buskets xuddi Messi kabi franchayzing futbolchisi maqomiga ega. Ispaniyalik futbolchi MLSda kamida ikki yil o‘ynashni rejalashtirmoqda.