Mirziyoyev jahon yetakchilari bilan norasmiy suhbatlar o‘tkazdi

Bugun, 12 noyabr kuni O‘zbekiston Prezidenti Shavkat Mirziyoyev Bakuda o‘tayotgan COP29 doirasidagi Jahon yetakchilari sammitida ishtirok etmoqda. Bu haqda Prezident matbuot xizmati xabar berdi.

Prezident matbuot kotibi Sherzod Asadovning ma’lum qilishicha, COP29 sammiti doirasida Mirziyoyev Turkiya Prezidenti Rajab Toyib Erdo‘g‘an, Buyuk Britaniya Bosh vaziri Kir Starmer, Pokiston Bosh vaziri Shahboz Sharif, Ozarbayjon parlamenti Raisi Sohiba Gafarova, FIFA prezidenti Janni Infantino bilan norasmiy suhbatlar o‘tkazgan.

“Bugun va ertaga davlatimiz rahbari o‘ndan ortiq muhim uchrashuv va muzokaralar o‘tkazishi kutilmoqda”, deydi Sherzod Asadov.

Asadov o‘z sahifasida e’lon qilgan suratlardan ko‘rinadiki, Shavkat Mirziyoyevga rafiqasi Ziroat Mirziyoyeva hamrohlik qilmoqda. 

Ma’lumot uchun, mazkur sammitda Qirg‘iziston Prezidenti Sadir Japarovga ham rafiqasi Oygul Japarova hamrohlik qilmoqda.