Mirziyoyev Quvayt Amirini O‘zbekistonga taklif qildi

O‘zbekiston Respublikasi Prezidenti Shavkat Mirziyoyev va Quvayt Davlati Amiri Shayx Mish’al as-Saboh bugun, 17 fevral kuni Al-Quvayt shahridagi "Al-Bayan" saroyida tor doirada uchrashuv hamda rasmiy delegatsiyalar a’zolari ishtirokida muzokara o‘tkazdi. Bu haqda Prezident matbuot xizmati xabar berdi.

Bildirilishicha, suhbat avvalida O‘zbekiston yetakchisi ko‘rsatilayotgan samimiy qabul va yuksak e’tibor uchun Amirga minnatdorlik bildirib, Quvayt Amiri va do‘st xalqini yaqinlashib kelayotgan milliy bayramlar bilan dildan qutlagan.

O‘zbekiston bilan Quvayt o‘rtasidagi do‘stlik va ko‘p qirrali sheriklik munosabatlarini yanada rivojlantirish va mustahkamlash masalalari ko‘rib chiqilgan.

Prezident Quvaytda muvaffaqiyatli amalga oshirilayotgan, maqsad va vazifalari Yangi O‘zbekiston taraqqiyot strategiyasining uzoq muddatli ustuvor yo‘nalishlariga hamohang bo‘lgan "Nigoh 2035" davlat dasturini alohida qayd etgan.

“Faol siyosiy muloqotlar va idoralararo almashinuvlar, o‘zaro tovar ayirboshlash va investitsiyalar hajmi barqaror ortib borayotgani mamnuniyat bilan ta’kidlandi”, deyiladi xabarda.

Qayd etilishicha, o‘tgan yili Hukumatlararo komissiyaning birinchi yig‘ilishi samarali o‘tkazilgan, qator muhim ishbilarmonlik tadbirlari tashkil etilgan. Savdo-iqtisodiy, investitsiyaviy, innovatsion va moliyaviy-texnik sohalardagi hamkorlik masalalariga alohida e’tibor qaratilgan.

Shuningdek, “Yashil” energetika, sanoat kooperatsiyasi, qishloq xo‘jaligi, transport va logistika, infratuzilma, shaharsozlik, sog‘liqni saqlash, turizm sohalari amaliy hamkorlikning ustuvor yo‘nalishlari sifatida belgilangan.

“Qo‘shma loyihalarni ilgari surish maqsadida Investitsiya platformasi va Ishbilarmonlar kengashi kabi mexanizmlarni yo‘lga qo‘yish, shuningdek, Al-Quvayt shahrida savdo uyini ochish bo‘yicha kelishuvga erishildi.

Yangi sheriklik dasturi doirasida Quvayt arab iqtisodiy taraqqiyot fondi bilan loyihalar portfelini kengaytirishga alohida e’tibor qaratildi”, deyiladi xabarda.

Bundan tashqari, O‘zbekiston va Quvaytda madaniyat va turizm haftaliklarini o‘tkazish, ikki mamlakat vakillarining san’at, musiqa, kino, ta’lim va sport sohalaridagi madaniy-gumanitar tadbirlarda faol ishtirok etishiga ko‘maklashishga kelishib olingan.

Uchrashuvda Birlashgan Millatlar Tashkiloti, Islom hamkorlik tashkiloti, Shanxay hamkorlik tashkiloti, Qo‘shilmaslik harakati va boshqa nufuzli tuzilmalar doirasida o‘zaro qo‘llab-quvvatlashni davom ettirish muhimligi qayd etilgan.

Joriy yil may oyida Samarqand shahrida o‘tkaziladigan "Markaziy Osiyo - Ko‘rfaz arab davlatlari hamkorlik kengashi" muloqoti sammitiga tayyorgarlik ko‘rish va uni o‘tkazish bo‘yicha qo‘shma chora-tadbirlar muhokama qilindi.

Yetakchilar xalqaro va mintaqaviy ahamiyatga molik dolzarb masalalar yuzasidan ham fikr almashdi.

Muzokaralar yakunida ikki davlat rahbarlari keng qamrovli sheriklikni rivojlantirish va mustahkamlashga qaror qilgan.

Muzokaralar yakunida Prezident Quvayt Amirini O‘zbekistonga tashrif bilan kelishga taklif etgan.