Mirziyoyev qurilish loyihalari taqdimoti bilan tanishib chiqdi

Prezident Shavkat Mirziyoyev bugun, 10 mart kuni qurilish loyihalari taqdimoti bilan tanishdi. Bu haqda Prezident Matbuot xizmati xabar berdi.

Mamlakat taraqqiyoti va hayot talabi bilan bunyodkorlik ko‘lami ortmoqda. Ayniqsa, Toshkent shahrida juda ko‘p ijtimoiy-iqtisodiy inshootlar qurildi. Davlat rahbari bu masalani alohida e’tiborga olib, poytaxtning me’moriy qiyofasini saqlab qolish, kelgusidagi qurilishlarni shahar tashqarisida qilish vazifasini qo‘ygan edi.

Shunga muvofiq, Yangi Toshkent shaharchasi loyihasi ishlab chiqilmoqda. Taqdimotda Prezidentga shu haqida axborot berilgan.

Unga ko‘ra, birinchi bosqichda 6 ming gektarda bunyodkorlik ishlari rejalashtirilgan. Shundan kelib chiqib, istiqbolli qurilish hududlari, yangi shahar bilan poytaxtni birlashtiruvchi asosiy yo‘llar sxemalari ishlab chiqilgan.

Shaharcha yangi ma’muriy va iqtisodiy markaz bo‘ladi. Poytaxtning sharqiy qismida, Yuqori Chirchiq va O‘rta Chirchiq tumanlari hududida barpo etiladi. 800 ming aholiga mo‘ljallangan bo‘ladi.

U yerda vazirlik va idoralar, oliy ta’lim muassasalari, sog‘liqni saqlash tashkilotlari, teatr, kutubxona, mehmonxonalar, turar joy binolari, bog‘lar o‘rin oladi. Xususan, yashil hududlar 363 gektarni tashkil qilishi ko‘zda tutilgan.

Ma’lumki, Samarqand viloyatida Imom Buxoriy majmuasi yangidan barpo etilmoqda. Bugungi kunda binolar qurib bitkazilib, pardozlash ishlari olib borilmoqda. Majmua devorlari milliy naqshlar bilan sayqallanadi, naqqoshlik va xattotlik san’ati uyg‘unlashadi. Uning devorlariga qadimiy uslubda Qur’oni karim suralari va hadislar yoziladi.

Prezident tashabbusi bilan majmuada Imom Buxoriy muzeyi ham tashkil etilishi rejalashtirilgan. Tadbirda ushbu muzeyning konseptual loyihasi taqdimoti ham o‘tkazilgan.

Muzey boy madaniy qadriyatlarni o‘zida jam qilish barobarida zamonaviy dizaynga ega bo‘ladi. 8 ta pavilon, xususan, Muhammad alayhissalom va nubuvvat tarixi, hadis ilmining paydo bo‘lishi va rivojlanishi, Imom Buxoriyning hayoti va ilmiy faoliyati, Imom Buxoriy fazilatlari, bolalar bo‘limi, “Al-jome as-sahih” – islom dinining ikkinchi manbasi, Imom Buxoriy merosining bugungi kundagi ahamiyati, Yangi O‘zbekistonda diniy-ma’rifiy islohotlar va Imom Buxoriy merosiga e’tibor kabi mavzularga bo‘linadi.

Davlat rahbari muzeydan o‘rin olgan har bir ashyo va vizual ma’lumot ziyoratchilarga ma’rifat yetkazishi kerakligini alohida qayd etdi.

Mamlakatda biznes muhit yaxshilangani sari tashqi savdo aloqalari ham kengayib bormoqda. Bunga mutanosib ravishda bojxona infratuzilmasini ham rivojlantirish zarurati tug‘ilmoqda.

Xususan, O‘zbekistonning Qozog‘iston bilan chegaradagi “G‘ishtko‘prik” bojxona posti orqali har kuni ko‘plab insonlar o‘tadi.

Shu bois mazkur bojxona posti uchun zamonaviy majmua barpo etish rejalashtirilgan. Yangi terminal, avtomobil yo‘li, avtoturargoh, oshxona, tibbiyot xonasi, savdo va maishiy xizmat shoxobchalari barpo etilishi ko‘zda tutilmoqda.

Prezident majmuada yo‘lovchilar uchun barcha qulayliklarni yaratish, bojxona nazorati va yuklarni o‘tkazish jarayonini raqamlashtirish bo‘yicha ko‘rsatmalar bergan.

Taqdimotda, shuningdek, mamlakatning Birlashgan Arab Amirliklari va Ozarbayjon Respublikasidagi elchixonalarining yangi binolari loyihalari haqida ham axborot berilgan.