Mirziyoyev Afg‘oniston bilan chegaraga borib, qo‘riqlash jarayoni bilan tanishdi (fotoreportaj)

O‘zbekiston Respublikasi Prezidenti, Qurolli Kuchlar Oliy Bosh Qo‘mondoni Shavkat Mirziyoyev Surxondayorga tashrifi bahonasida Davlat xavfsizlik xizmati Chegara qo‘shinlarining viloyatdagi vzvodlaridan biriga bordi. 

Ma’muriy binodagi sharoitlar, chegarani qo‘riqlashda qo‘llanilayotgan harbiy texnika va qurol-aslahalar ko‘zdan kechirildi. Davlat chegarasini qo‘riqlashda uchuvchisiz uchish apparatlarining ahamiyati ta’kidlandi.

Davlat rahbari O‘zbekiston-Afg‘oniston chegarasini qo‘riqlash jarayoni bilan yaqindan tanishdi.

Mamlakatimizda qo‘shinlarning jangovar shayligini oshirish bilan birga harbiy xizmatchilar va ularning oila a’zolarini ijtimoiy himoyalashga katta e’tibor qaratilmoqda. Ushbu vzvod yonida ham shinam xonadonlar barpo etilgan.

Davlat rahbari shunday xonadonlardan birida mehmon bo‘ldi. Harbiy xizmatchilarning oila a’zolari bilan suhbatlashdi.

“Vatanimiz himoyachilarining o‘z vazifalarini xotirjam bajarishi, farzandlar tarbiyasi sizlarga bog‘liq. Turmush o‘rtoqlaringizga madadkor bo‘lib, katta jasorat ko‘rsatayapsiz. Sizlar ham Vatan himoyachisizlar”, deydi Shavkat Mirziyoyev harbiylarning rafiqalariga.

Hovlida o‘yingohlar, sport maydonchalari, ayollar uchun tikuvchilik va qandolatchilik xonasi tashkil qilingan. Bolalarni maktab va bog‘chaga eltish uchun avtobus yo‘lga qo‘yilgan.