Mashhur qo‘shiqchi o‘z konsertida vafot etdi

Bugun, 31 mart kuni turkiyalik san’atkor Volkan Konak Shimoliy Kiprda o‘z konserti vaqtida olamdan o‘tdi. Bu haqda “Cumhuriyet” xabar berdi.

Ma’lum qilinishicha, “Shimol o‘g‘li” taxallusi bilan tanilgan san’atkor o‘z konsertida, muxlislari oldida sahnaga yiqilib tushgan va bir muddatdan so‘ng shifoxonada olamdan o‘tgan.

Qayd etilishicha, u konsert chog‘ida yurak xurujiga uchragan. San’atkor 58 yoshda bo‘lgan.

“Bugun tunda soat 00:17 da to‘satdan kasallik tufayli Magusa davlat shifoxonasiga olib kelingan qo‘shiqchi Volkan Konak barcha muolajalarga qaramay, afsuski, soat 00:42 da hayotdan ko‘z yumdi. Magusa davlat shifoxonasi bosh shifokori tomonidan batafsil ma’lumot yozma ravishda beriladi”, deyilgan shifoxona bayonotida.

Ma’lumot uchun, Volkan Konak 1967 yilda Trabzon viloyatining Machka tumanida tug‘ilgan. Machkada boshlang‘ich va o‘rta ta’limni tamomlagach, 1983-1984 yillarda Istanbul Turk musiqa davlat konservatoriyasiga o‘qishga kirgan. Uning “Maranda” nomli albomi ko‘plab tinglovchilarining e’tirofiga sazovor bo‘lgan.