Xarri Keyn va Maurisio Pochettino yana bir jamoada bo‘lishi mumkin

Xarri Keyn Maurisio Pochettino qo‘li ostida “Tottenxem”da juda muvaffaqiyatli harakat qilgan edi. Shuningdek, ularning o‘rtasidagi munosabat ham ancha iliq bo‘lgan.

Agar, Pochettino “Manchester Yunayted”ning keyingi murabbiyi bo‘lsa, u “qizil iblislar” safida sobiq shogirdi Xarri Keyni ham ko‘rishni xohlaydi, deb yozadi "The Telyegraph".

Aslini olganda, Maurisioning PSJdagi ishlari unchalik yomon emas, lekin rahbariyat Zidanni olib kelmoqchi degan fikrlar tinmayapti. Shuning uchun, argentinalik murabbiy o‘ziga to‘la ishonilmaydigan joydan "qochmoq"chiga o‘xshaydi. Ustiga-ustak, u uchun qadrdon APLda yaxshi darajadagi “boss”ni anchadan beri qumsayotgan “Manchester Yunayted” Pochettinoni kutib turibdi. Ko‘p ehtimol, Maurisio APLga qaytadi.

Xarri Keyn yozda “Manchester Siti”ga qarab, rosa talpindi. Biroq “Tottenxem” rahbariyati  uni qo‘yib yubormadi. Keyin uning o‘yinida jiddiy pasayish bo‘ldi. Kelayotgan yozda ingliz baribir “shporlar” safini tark etsa kerak. Faqat bu safar “Tottenxem” xo‘jayinlariga taklif qilinadigan pul aql bovar qilmas darajada katta bo‘lmaydi. "Otimning o‘lishini bilganimda, bir qop kepakka almashardim", degan maqol bo‘lardi. Keynning o‘yini susayishini bilganimizda o‘tgan yozda “Manchester Siti”ga sotib yuborardik deyishdan o‘zga chora yo‘q.

Ma’lumot o‘rnida, Xarri Keyn APLda 21 ta o‘yinda maydonga tushib, 5 ta gol va 2 golli uzatma amalga oshirgan. Keyn uchun uyatli statistika har holda, ortda qolgan mavsumlarda 20-30 talab gollar urardi. "Transfermarkt" tomonidan, Keyn 100 million yevroga baholanmoqda. Katta ehtimol, yozgacha bu narx yanada qulaydi. Aytgancha, bir paytlar uning xaridorlari 200 million yevro berishga ham tayyor edi.