Katta janglar oldidagi o‘zbek bokschilari – Sport dayjesti

Falastinni qo‘llab-quvvatlagani uchun qamoq jazosiga hukm qilingan futbolchi, WBA kamari uchun raqibi aniq bo‘lgan Isroil Madrimov va shaxsiy titullari sonini oshirib olgan Krishtianu Ronaldu bugun diqqat markazimizda. Assalomu alaykum. QALAMPIR.UZ’da sport dayjesti

Olimpiada oldidan Fransiya xavfsizlik choralarini kuchaytirmoqda

Parijdagi Olimpiada o‘yinlarining ochilish marosimiga yetti oy qolganida Fransiya teraktlarning oldini olish rejasini ishlab chiqdi. 

Olimpiada o‘yinlarining ochilishi misli ko‘rilmagan formatda o‘tkazilishi rejalashtirilgan. Tadbir stadionda emas, Sena daryosi qirg‘og‘ida bo‘lib o‘tadi. Mehmonlar soni taxminan 600 ming kishini tashkil qiladi. 

Shunday qilib, hokimiyat xavfsizlikni o‘rnatish uchun jiddiy choralarni ko‘rishga qaror qildi.

Fransiya Ichki ishlar vazirligi ma’lumotlariga ko‘ra, belgilangan vazifalarni bajarish uchun 40 ming harbiy va politsiya xodimlari ajratilishi kutilmoqda. Har 100 metr hududga to‘rt kishidan xavfsizlik xodimi o‘z faoliyatini olib borishi ko‘zda tutilyapti.

Parij havo hududi va yaqin atrofdagi metro bekatlari ham ochilish kuni yopiladi.

Ma’lumot uchun, Olimpiada bahslari 26 iyuldan 11 avgustga qadar o‘tkaziladi. Bu tarixdagi 33-Olimpiada hisoblanadi.

Yangilangan WBA reytingida 4 nafar o‘zbek bokschisi yetakchi bo‘ldi

Butunjahon boks assotsiatsiyasi (WBA) dekabr oyi  bo‘yicha yangilangan reytingni e’lon qildi.
Yangilangan reytingda 4 nafar o‘zbekistonlik bokschi 1-o‘rinda qayd etildi. 
Umumiy hisobda  7 nafar o‘zbekistonlik charm qo‘lqop ustasi ushbu ro‘yxatdan joy oldi. 

Jumladan:

• Hasanboy Do‘stmatov - (minimal vazn) 2-o‘rin;
• Murodjon Ahmadaliyev (birinchi yarim yengil vazn) 1-o‘rin;
• Otabek Xolmatov (yarim yengil vazn) - 1-o‘rin;
• Botir Ahmedov (super yengil vazn) - 8-o‘rin (o‘tgan oyda 7-o‘rinda edi);
• Shahram G‘iyosov (yarimo‘rta vazn) - 1-o‘rin;
• Isroil Madrimov (super yarim o‘rta vazn) - 1-o‘rin;
• Bektemir Meliqo‘ziyev (super o‘rta vazn) - 6-o‘rin.

Polshalik grossmeyster JCHda rossiyalik shaxmatchi bilan ko‘rishishdan bosh tortdi

2023 yil 26-30 dekabr kunlari Samarqand shahrida o‘tkazilgan tezkor shaxmat bo‘yicha Jahon chempionatida polshalik grossmeyster Yan-Kshishtof Duda rossiyalik shaxmatchi Denis Xismatullin bilan qo‘l berib ko‘rishmadi. 

Ijtimoiy tarmoqlarlarda tarqalgan videoga ko‘ra, o‘yin boshlanishidan oldin Xismatullin raqibi bilan qo‘l siqishmoqchi bo‘lgan, biroq polshalik shaxmatchi u bilan ko‘rishishni istamagan.

Qayd etilishicha, Xismatullin Rossiyaning Ukrainadagi "harbiy operatsiyasi"ni qo‘llab-quvvatlaydi. Shu boisdan ham Duda rus raqibining do‘stona munosabatini rad etgan. Dudaning bu ishi ko‘pgina taniqli ukrainaliklarning e’tirofiga sabab bo‘ldi.

Ma’lumot uchun, 2023 yilgi tezkor shaxmat bo‘yicha Jahon chempionatida norvegiyalik grossmeyster Magnus Karlsen g‘alaba qozondi. Bu Karlsenning tezkor shaxmat bo‘yicha Jahon chempionatidagi beshinchi g‘alabasi bo‘ldi. Bungacha Magnus 2014, 2015, 2019 va 2022 yillarda jahon chempioni bo‘lgan.

Isroil Madrimov WBA kamari uchun kim bilan jang qiladi?

Super yarim o‘rta vaznda janglar o‘tkazadigan o‘zbekistonlik professional bokschi Isroil Madrimovning Butunjahon boks assotsiatsiyasi (WBA) kamari uchun raqibi ma’lum bo‘ldi.

Chempionlik bahsida Madrimovga rossiyalik Magomed Qurbonov raqiblik qiladi. O‘zbekistonlik charm qo‘lqop ustasi o‘z vaznida WBA kamari uchun 1-raqamli da’vogar hisoblanadi. Qurbonov esa 2-raqamli da’vogar sifatida qayd etilgan.

Mazkur vaznda WBA, WBO va IBF kamarlari egasi amerikalik Jermell Charlo edi, biroq Charlo vaznini o‘zgartirib, Saul Kanelo Alvares bilan jang qildi va mag‘lubiyatga uchradi. Charlo o‘z vazniga qaytdi, ammo majburiy da’vogarlar bilan jang qilishni istamadi. Shuning uchun u WBA, WBO va IBF kamarlardan mahrum qilindi.

Falastinni qo‘llab-quvvatlagan futbolchi qamoq jazosiga hukm qilindi

3 yanvar kuni “Nitssa” himoyachisi Yusuf Atalga “diniy asosda nafrat uyg‘otish” aybi bilan 8 oylik shartli qamoq jazosi va 45 ming yevro jarima tayinlandi.

Oktyabr oyida Falastin-Isroil mojarosi keskinlashishi fonida futbolchi ijtimoiy tarmoqlarda butun dunyo bo‘ylab yahudiylarni tanqid qilgan va Isroil bilan mojaroda Falastinni qo‘llab-quvvatlovchi videosini e’lon qilgandi. 

Keyinroq futbolchi o‘z postini o‘chirib tashladi va omma oldida uzr so‘radi. Biroq u qo‘ygan videoning jiddiyligini inobatga olib, klub futbolchiga nisbatan zudlik bilan birinchi intizomiy jazo qo‘lladi va uni jamoadan chetlashtirdi.

Keyinchalik, xuddi shu sababga ko‘ra, Atal Fransiya Professional Futbol Ligasi (LFP) tomonidan yettita o‘yinga diskvalifikatsiya qilindi.

Joriy mavsumda 27 yoshli himoyachi “Nitssa” tarkibida oltita o‘yinda maydonga tushib, 1 ta gol urishga muvaffaq bo‘ldi. U 1 oktyabrdan beri maydonga tushmadi, biroq futbolchiga qo‘yilgan taqiq dekabr oyi oxirida nihoyasiga yetgandi. Fransuz jamoasi Liga 1 da 2-o‘rinda bormoqda. Jamoa keyingi turda 13 yanvar kuni “Renn”ga qarshi maydonga tushadi.

Shu bilan birga, Atal Jazoir terma jamoasining a’zosi hisoblanadi. Sentyabr-oktyabr oylarida u o‘rtoqlik o‘yinlarida, noyabrda esa JCH-2026 saralash bahslarida maydonga tushgan. U hozirda Afrika kubogiga tayyorgarlik ko‘rayotgan “cho‘l tulkilari” ixtiyorida. Turnir 13 yanvardan 11 fevralga qadar Kot-d'Ivuarda bo‘lib o‘tadi.
O‘zbekistonlik 5 nafar para taekvondochi Paralimpiada yo‘llanmasini qo‘lga kiritdi

Butunjahon taekvondo federatsiyasi Parij-2024 yozgi Paralimpiya o‘yinlariga litsenziya beruvchi reytingni e’lon qildi. Unga ko‘ra, ilk bor o‘zbekistonlik 5 nafar para taekvondochi reyting orqali Parij-2024 yozgi Paralimpiya o‘yinlariga litsenziyani qo‘lga kiritdi. 

Ayollar:

• Ziyoda Isoqova (-47 kg);
• Guljanoy Naimova (+65 kg).

Erkaklar:

• Zuhriddin Tohirov (-63 kg);
• Javohir Aliqulov (-70 kg);
• Asad Toshtemirov (-80 kg).

Ta’kidlash joiz, O‘zbekiston delegatsiyasi Tokio-2020 yozgi Paralimpiya o‘yinlarining para taekvondo dasturida 3 nafar sportchi bilan ishtirok etgan.Hozirga kelib, Parij-2024 Paralimpiadasida ishtirok etuvchi o‘zbekistonlik para atletlar soni 33 nafarga yetdi.

Ronaldu Maradona mukofoti bilan taqdirlanadi

“Al-Nasr”ning 38 yoshli hujumchisi Krishtianu Ronaldu o‘z kolleksiyasini yana bir sovrin bilan to‘ldiradigan bo‘ldi. Futbolchi yilning eng yaxshi to‘purari uchun beriladigan Maradona mukofoti bilan taqdirlanadi. Mukofot 19 yanvar kuni Dubai Globe Soccer Awards 2023 marosimida topshiriladi. Bu haqda “Goal” xabar berdi.

Besh karra “Oltin-to‘p” sohibi 2023 yilda “Al-Nasr” va Portugaliya terma jamoasi safida 54 ta gol urdi. To‘purarlar poygasida portugaliyalik forvard PSJ hujumchisi Kilian Mbappe (52 gol) va “Bavariya” hujumchisi Harri Keyn (52), shuningdek, “Manchester Siti” hujumchisi Erling Xoland (50) kabi futbolchilarni ortda qoldirdi.

Dekabr oyida Krishtianu Ronaldu Saudiya Arabistoni Pro ligasining eng yaxshi futbolchisi sovrinini qo‘lga kiritdi. Dekabrda u 5 ta o‘yinda 5 ta gol urib, 3 ta golli uzatmani amalga oshirdi.Joriy mavsumda portugaliyalik futbolchi Saudiya Arabistoni chempionatida 18 uchrashuvda 20 ta gol urdi va 9 ta golli uzatmani amalga oshirdi.

Shahram G‘iyosovning navbatdagi jangi tasdiqlandi

Yarim o‘rta vazn toifasida janglar o‘tkazadigan o‘zbekistonlik charm qo‘lqop ustasi Shahram G‘iyosovning profboksdagi 15-jangi sanasi va raqibi aniq bo‘ldi

G‘iyosov 24 fevral kuni AQSHning Orlando shahrida meksikalik Pablo Sezar Kano bilan jang qiladi. Ushbu to‘qnashuv da’vogarlik maqomida o‘tadi, ya’ni jang g‘olibi Butunjahon boks assotsiatsiyasi (WBA) kamari uchun rasmiy da’vogarga aylanadi.

Ta’kidlash joiz, o‘zbekistonlik bokschining raqibi shu vaqtga qadar ikki marta jahon chempionligi uchun ringga ko‘tarilgan, biroq har ikki jangda raqibiga imkoniyatni boy bergan.

Ma’lumot uchun, G‘iyosov hozirgacha profboksda 14 ta jang o‘tkazgan va janglarning barchasida g‘alaba qozongan. 9 ta bahsda raqibini muddatidan avval mag‘lubiyatga uchratgan. 34 yoshli Pablo Sezar Kano esa faoliyati davomida 44 ta jang o‘tkazib, 35 g‘alaba, 8 mag‘lubiyat va 1 durang qayd etgan.

Dunyo futboli katta yo‘qotishga uchradi

Braziliyalik sobiq futbolchi Mario Zagallo 92 yoshida vafot etdi. Bu haqda sobiq futbolchining Instagram sahifasida xabar berildi.

Zagollo futbolchilik va murabbiylik faoliyati davomida Braziliya terma jamoasi bilan  to‘rt marta jahon chempioni bo‘lgan. Jumladan, u ko‘plab futbol mutaxassislari tomonidan futbol tarixidagi eng yaxshi terma jamoa sifatida e’tirof etiladigan 1970 yilgi terma jamoaga ustozlik qilgan. 

Mario Zagollo futbolchi sifatida 1958 va 1962 yillardagi jahon chempionatlarida g‘olib chiqqan. 1970 yilda terma jamoa bosh murabbiyi sifatida turnir g‘olibi bo‘lgan. Uning jamoasida Pele, Jairzino, Roberto Rivelino va Tostao kabi futbolchilar to‘p tepgan. Zagallo futbol tarixida ham futbolchi, ham murabbiy sifatida jahon chempionligini qo‘lga kiritgan birinchi inson hisoblanadi. Shuningdek, 1998 yilda Zagallo terma jamoa bosh murabbiyi sifatida finalga chiqqandi, ammo o‘shanda pentakampionlar Fransiyaga mag‘lub bo‘lgan.

Bu QALAMPIR.UZ'da ortda qolayotgan hafta sportiga oid eng muhim yangiliklar edi. Sahifalarimizga obuna bo‘ling va izohlar bo‘limida o‘z fikringizni bildiring. Ko‘rishguncha.