Kanada 36 yil deganda ilk bor Jahon chempionatiga chiqdi

Futbol bo‘yicha Kanada milliy terma jamoa KONKAKAF mintaqasida saralash bosqichi doirasida Yamayka termasini 4-0 hisobida mag‘lub etib, Jahon chempionatining final bosqichiga yo‘llanmani qo‘lga kiritdi.

Shu tariqa, Kanada 13 uchrashuvda 28 ochko bilan guruhda peshqadamlik qilmoqda va saralash bosqichi yakunlanishiga bir tur qolganida Qatar-2022 yo‘llanmasini qo‘lga kiritdi. Sababi so‘nggi uchrashuvda qanday natija qayd etishidan qat’iy nazar Kanada 3-o‘rindan pastga tushmaydi.

Germaniyaning “Bavariya” klubida to‘p tepadigan kanadalik futbolchi, Alfonso Devis jarohat sababli milliy terma jamoa safida maydonga tusha olmadi. Biroq Devis Kanada termasi libosida internet orqali jonli efirga chiqdi va yurtining bosh jamoasi Qatarda bo‘lib o‘tadigan Jahon chempionatiga yo‘llanmani qo‘lga kiritgach, ko‘z yoshlarini tiyib tura olmadi. 

Shunday qilib, Kanada terma jamoasi o‘z tarixida ikkinchi marta futbol bo‘yicha Jahon chempionatida o‘ynaydigan bo‘ldi. 1986 yili Meksikada o‘tkazilgan mundialda kanadaliklar birinchi bor qatnashgan edi.

Ma’ruf Abdumalikov