Qo‘shnilarimizga qancha suv kerak bo‘lsa, shuncha beramiz – Japarov

Qirg‘iziston Prezidenti Sadir Japarov joriy yilda suv taqchilligini bartaraf etish uchun yangi sutkalik (BSR) va o‘n kunlik (BDR) tartibga solish havzalari qurilishini, bu esa qo‘shni davlatlarni ham suv bilan ta’minlashini aytdi. Bu haqda u “Kabar” axborot agentligiga bergan intervyusida so‘z ochdi.

“Suvimiz yetishmasa, nega qo‘shnimizga suv berishni to‘xtatmaymiz?” deganlar ham bor, agar biz BSR va BDRda suv yig‘ib olsak, quyi oqimda yashaydiganlar qiynalib qolmaydimi?” deb so‘raydi jurnalist Prezidentdan.

Sadir Japarovning aytishicha, hozirda mavjud hovuzlarda yetarlicha suv to‘planmayapti.

"Suv yetarli darajada to‘planmagani uchun fermerlar sug‘orish mavsumida suv tanqisligini boshdan kechirdi. Bu yil biz hamma narsani tozalayapmiz. Bundan tashqari, butun mamlakat bo‘ylab yangi BSR va BDRlarni qurish bo‘yicha ko‘rsatmalar berdim. Bu BSR va BDRlar birinchi navbatda quyi oqimda yashovchi qo‘shnilarimiz uchun foydalidir. Agar qishda BSR va BDRda erigan suvni yig‘ib olsak, bahordan daryo suvi butunlay qo‘shnilarga oqib o‘tadi. Ya’ni ular avvalgidan ham ko‘proq suv oladi. Sug‘orish mavsumida fermerlarimiz BSR va BDR suvlaridan, qo‘shnilarimiz esa oqar suvdan foydalanishlari mumkin bo‘ladi”, deydi Qirg‘iziston rahbari.

Uning so‘zlariga ko‘ra, Qirg‘iziston hukumati qishda oqadigan suvdan maksimal foyda olishga intiladi.

“Qo‘shnilarimizga qancha suv kerak bo‘lsa, shuncha suv beramiz”, deya ta’kidlaydi Japarov.

Misol tariqasida u qurilayotgan Qambarota GES-1 ni keltirdi. Qirg‘iziston rahbarining so‘zlariga ko‘ra, undan qo‘shni davlatlar suv resurslari ko‘rinishida naf ko‘radi.

"Biz faqat elektr energiyasidan foydalanamiz. Norin daryosi suvining bor-yo‘g‘i 1 foizini sug‘orish va ichimlik suvi uchun foydalanamiz. 99 foizi O‘zbekiston va Qozog‘istonga ketadi. Qambarota GES-1 qurib bitkazilgach, undan foydalanish imkoniga ega bo‘lamiz. Biz undan qishda elektr energiyasi ishlab chiqarish, sug‘orish mavsumida esa qo‘shnilarga To‘qto‘g‘ul GESida to‘plangan suvni yetarli miqdorda yetkazib berish uchun foydalanishimiz mumkin. Hozirda qishda elektr energiyasi ishlab chiqarish uchun To‘qto‘g‘ul GESidan foydalanamiz, lekin yozda uni to‘xtatishga to‘g‘ri keladi. Kelasi qish uchun suvni tejamasak, elektrsiz qolamiz. Bu muammolarni hal qilish ustida ishlayapmiz. Biz nafaqat o‘zimizni, balki qo‘shnilarimizni ham o‘ylaymiz, chunki qo‘shnichiligimiz abadiy, umumiy muammolarni birga o‘ylashimiz kerak. Biz daryoning boshida turibmiz va suv bermaymiz, deb bahslashish bema’nilikdir. Barchamiz qardosh xalqmiz, abadiy qo‘shnimiz va ko‘p jihatdan bir-birimizga bog‘liqmiz. Men hamma narsani sanab o‘tmayman, buni odamlarning o‘zlari juda yaxshi biladi”, deya qo‘shimcha qilgan Qirg‘iziston Prezidenti.