Qidirilayotgan 2 nafar “jurnalist”ga nisbatan “qamoqqa olish” chorasi o‘zgartirildi

Avvalroq O‘zbekiston Bosh prokuraturasi tomonidan “Effect.uz” axborot agentligining 2 nafar muxbiriga nisbatan JKning 219 va 236-moddalari bilan sirtdan ayb e’lon qilinib, sudning ajrimi bilan “qamoqqa olish” ehtiyot chorasi qo‘llanilib, qidiruvga berilgani haqida xabar bergan edik.

Bosh prokuratura Matbuot xizmatining ma’lum qilishicha, axborot agentligining 2 nafar muxbiriga ilgari qo‘llanilgan “qamoqqa olish” ehtiyot chorasi Surxondaryo viloyati prokuraturasi tomonidan “munosib xulq-atvorda bo‘lish to‘g‘risida tilxat” tarzidagi ehtiyot chorasiga o‘zgartirilgan.

Eslatib o‘tamiz, Joriy yilning yanvar oyida “Effect.uz” saytida ushbu saytning xodimlari jinoyat ishlari bo‘yicha Termiz tumani sudi raisi xizmat xonasiga bostirib kirib, sud majlisida ishtirok etish va jarayonni tasvirga olishni talab qilishganligi haqida videoyozuv chiqarilgan. Videoyozuvda qayd etilgan holatga huquqiy baho berish maqsadida Sudyalar oliy kengashi raisi tomonidan O‘zbekiston Respublikasi Bosh prokurori nomiga taqdimnoma kiritilgan.

Mazkur holat yuzasidan Surxondaryo viloyati Termiz tumani prokuraturasi tomonidan o‘tkazilgan tergovga qadar tekshiruv natijalariga ko‘ra, Jinoyat kodeksining 236 va 219-moddalari bilan jinoyat ishi qo‘zg‘atilib, tergov harakatlari Surxondaryo viloyat prokuraturasi tomonidan olib borilgan.

Tergov harakatlari jarayonida jinoyat ishiga aloqador bo‘lgan “Effect.uz” axborot agentligining 2 nafar muxbiri va 1 nafar ayol ko‘plab marotaba tergov organiga rasman chaqirtirilgan bo‘lsa-da, noma’lum sabablarga ko‘ra kelishdan bo‘yin tovlagan.

O‘z navbatida, “Effect.uz” axborot agentligining yana 1 nafar muxbiri tergovga qadar tekshiruv hamda tergov harakatlari jarayonlarida chaqirtirilgan vaqtda tergov organiga yetib kelgan va u bilan bog‘liq tergov harakatlari o‘tkazilgan, xuddi shuningdek, u doimiy ravishda o‘zining konstitutsiyaviy burchini bajarishi, chaqirilgan vaqtga tergov organiga yetib kelishini bildirgan.