Ijtimoiy himoyaga muhtoj qatlamlarga yordam puli tarqatiladi

Jamiyat 19443
image

Pensionerlar, nafaqaxo‘rlar va kam ta’minlanganlarga bir martalik pul yordami ko‘rsatiladi. Bu haqda O‘zbekiston Prezidenti Shavkat Mirziyoyevning “Aholining ijtimoiy himoyaga muhtoj qatlamlarini manzilli qo‘llab-quvvatlashga oid qo‘shimcha chora-tadbirlar to‘g‘risida”gi qarorida belgilangan. Qaror “O‘zbekiston24” kanali efirida o‘qib, eshittirildi.

Qarorga ko‘ra, ijtimoiy himoyaga muhtoj aholining quyidagi qatlamlariga davlat byudjetidan bir martalik moddiy yordam ko‘rsatiladi:

a) yoshga doir, nogironlik pensiyasi va nafaqasini oluvchilarga, bolalikdan nogironlik nafaqasini hamda boquvchisini yo‘qotganlik pensiyasini va nafaqasini oluvchi har bir oila a’zosiga hamda o‘zgalar parvarishiga muhtoj nogironligi bo‘lgan 18 yoshgacha bolalarning parvarishlash nafaqasini oluvchilarga:

Bunda, Qoraqalpog‘iston Respublikasi va viloyatlarda – 300 ming so‘mdan, Toshkent shahrida - 400 ming so‘mdan.

b) “Ijtimoiy himoya yagona reyestri” axborot tizimi orqali kam ta’minlangan sifatida moddiy yordam oluvchi oilalarga hamda kam ta’minlangan sifatida bolalar nafaqasini oluvchi oilalarning har bir 18 yoshga to‘lmagan bolasiga – 200 ming so‘mdan.

Bir nechta toifa bo‘yicha bir martalik moddiy yordam olish huquqiga ega bo‘lgan shaxslarga bir martalik moddiy yordam har bir toifa bo‘yicha to‘lab beriladi.

Qayd etilishicha, uyida vaqtincha bo‘lmaganligi yoki boshqa sabablarga ko‘ra bir martalik moddiy yordam pullarini o‘z vaqtida ololmagan fuqarolar to‘lanmagan moddiy yordam pullarini 2022 yil 1 sentyabrga qadar olish huquqiga ega.

Shuningdek:

•  “Temir daftar”ga kiritilgan, lekin mazkur qarorga asosan bir martalik moddiy yordam pullarini olmagan ehtiyojmand oilalar ro‘yxati tuzilib, “Saxovat va ko‘mak” jamg‘armasi mablag‘lari hisobidan ushbu oilalarning har bir a’zosiga 20 kilogrammdan bepul un tarqatiladi;

•  ijtimoiy ahvoli og‘ir oilalarga “Saxovat va ko‘mak” jamg‘armasi va boshqa manbalar hisobidan bepul un tarqatiladi yoki naqd pul ko‘rinishida moddiy yordam ko‘rsatib boriladi.

Yulduz Abdurashidova
Maqolaga baho bering
Baholaganlar: 297
Reyting: 3
t
×