Il-76 ga zarba Ukraina havo mudofaa tizimlari tomonidan berilgan – Putin

Rossiya Prezidenti Vladimir Putin birinchi marta Il-76 samolyotining Belgorod viloyatida halokatga uchrashiga izoh berdi. Bu haqdagi videolavhani muxbir Pavel Zarubin e’lon qildi. 

Uning so‘zlariga ko‘ra, samolyot Ukraina harbiylari tomonidan xorijda ishlab chiqarilgan – amerikalik yoki yevropalik havo hujumidan mudofaa tizimi yordamida urilgan.

"Hech qanday sharoitda bu "do‘stona olov" bo‘lishi mumkin emas edi. Chunki samolyot armiya vositalari bilan emas, havo hujumidan mudofaa raketalari bilan urilgan. Ta’rifga ko‘ra, bizning havo mudofaasi o‘z samolyotiga zarba bera olmaydi. U yerda “do‘st-dushman” tizimlari mavjud va operator tugmani qanchalik bosmasin, bizning havo hujumidan mudofaa tizimlarimiz ishlamaydi. Voqea joyida qo‘lga olingan qurollar esa bu havo hujumidan mudofaa raketasi ekanligini ko‘rsatadi”, deydi Putin Shimoliy harbiy okrugda qatnashayotgan talabalar bilan uchrashuvda.

Uning so‘zlariga ko‘ra, havo hujumidan mudofaa raketalari Amerika Patriot tizimlari yoki Yevropa, ehtimol fransuzlarnikidir.

“Ammo bunga bir-ikki kundan keyin aniq javob beriladi”, deya qo‘shimcha qilgan Rossiya Prezidenti.

Putinning iddao qilishicha, Ukraina Mudofaa vazirligining Bosh razvedka boshqarmasi Rossiya tomoni asirga olingan harbiy xizmatchilarni olib ketayotganini bilgan.

“Ular bu ishni ataylab yoki xato bilanmi, o‘ylamasdan qilishdimi, bilmayman, lekin shunday qilishdi. Ammo biz faqat uchuvchilarimizdan afsusdamiz, ularning oila a’zolariga hamdardlik bildiraman”, deydi Putin.

Eslatib o‘tamiz, Rossiyaning Il-76 harbiy-transport samolyoti 24 yanvar kuni ertalab Belgorod viloyatida halokatga uchradi. Rossiya Mudofaa vazirligining da’vo qilishicha, bortda Belgorodga almashish uchun olib ketilayotgan 65 nafar ukrainalik harbiy asir, shuningdek, olti ekipaj a’zosi va uch nafar hamroh bo‘lgan. Ularning barchasi, Rossiya rasmiylariga ko‘ra, vafot etgan. 

Rossiya Mudofaa vazirligi Il-76 halokatini terakt deb atadi va bunda Ukraina harbiylarini aybladi. Ukraina hukumati halokat uchun javobgarlikni o‘z zimmasiga olmadi. Ukraina harbiy razvedkasi 24 yanvar kuni Moskva va Kiyev asirlarni almashishga tayyorlanayotganini tasdiqladi va Ukraina tomonida Il-76 bortida kim bo‘lgani haqida ishonchli ma’lumotlar yo‘qligini qo‘shimcha qildi.

Avvalroq Vladimir Zelenskiy samolyot halokati bo‘yicha xalqaro tergov o‘tkazilishini talab qilgandi.