Fransiyalik taniqli futbolchi faoliyatini yakunladi

Fransiya terma jamoasi va "Bavariya"ning sobiq yarim himoyachisi Frank Riberi professional futboldagi faoliyatini yakunladi. Bu haqda futbolchining o‘zi ijtimoiy tarmoqdagi sahifasida ma’lum qildi.

“Ajoyib sarguzasht uchun barchangizga rahmat”, deb yozdi Riberi.

Futbolchining so‘nggi jamoasi Italiyaning "Salernitana" klubi bo‘ldi. Tomonlar o‘zaro kelishuviga ko‘ra shartnomani bekor qilishdi.

Riberi faoliyatidagi eng yorqin davrni Myunxenning "Bavariya" jamoasida o‘tkazdi. U "Bavariya" bilan to‘qqiz marta Germaniya chempionati g‘olibligini qo‘lga kiritdi, olti marta Germaniya kubogi, Germaniya liga kubogi, besh marta mamlakat Superkubogiga ega chiqdi. Shuningdek, Frank Yevropa Chempionlar ligasi, UEFA superkubogi va Klublar o‘rtasidagi Jahon chempionatining oltin medallariga sazovor bo‘ldi.

Ma’lumot uchun, Riberi ko‘pgina individual sovrinlar sohibi ham hisoblanadi. 2013 yilda u Yevropaning "Eng yaxshi futbolchisi" deb topilgan.

Shaxzod Shukurov