Fayzullayevning transfer narxi oshdi 

O‘zbekiston terma jamoasi va Moskvaning SSKA klubi a’zosi Abbosbek Fayzullayevning transfer narxi 2 million yevroga oshdi. Bu haqda “Transfermarkt” portali xabar berdi.

Shunday qilib, Fayzullayevning qiymati 8 million yevroga yetdi va 21 yoshli futbolchi O‘zbekistonning eng qimmat ikkinchi futbolchisi bo‘lib qoldi. 

O‘zbekistonning eng qimmat futbolchilar top-3'ligini terma jamoa sardori va Rimning “Roma” klubi hujumchisi Eldor Shomurodov yakunlab turibdi. 29 yoshli futbolchi 5 million yevroga baholangan. 

Ma’lumot uchun, O‘zbekistonning eng qimmat futbolchisi Fransiyaning “Lans” klubi a’zosi Abduqodir Husanov hisoblalandi. Yaqindagina Husanovning transfer qiymati yangilandi va hozirda 20 yoshli futbolchining narxi 12 million yevroni tashkil qilmoqda.

Eslatib o‘tamiz, avvalroq O‘zbekistonning eng yaxshi futbolchisi bo‘lish uchun yakuniy 3 nafar nomzod nomi e’lon qilingandi. Nomzodlar orasidan Abbosbek Fayzullayev va Abduqodir Husanov ham o‘rin olgan.