Faqat O‘zbekistonda o‘sadigan noyob o‘simlik Xalqaro Qizil ro‘yxatga kiritildi

O‘zbekiston florasining noyob vakili Moluccella Bucharica (Buxoro molusellasi) Ryding relikt va endemik turi Turlarni muhofaza qilish xalqaro ittifoqining (IUCN) Qizil ro‘yxatiga “butunlay yo‘q bo‘lib ketish arafasida” (“critically endangered”) maqomi ostida kiritildi. Bu haqda O‘zbekiston Fanlar akademiyasi ma’lum qildi.

Ta’kidlanishicha, ushbu ish Fanlar akademiyasi Botanika instituti olimlari tomonidan kamyob turlarni xalqaro qizil ro‘yxatga kiritilishi bo‘yicha dastlabki natija hisoblanadi.

Buxoro molusellasi dunyo bo‘yicha faqatgina Surxondaryo viloyatining Boysun tumani hududida o‘sadi. Yarim asr davomida tur populyatsiyasi 79 foizga qisqarib ketdi. Bugungi kunda ushbu kamyob turning tabiatdagi umumiy soni 600 ga ham yetmaydi. 

Olimlarning ta’kidlashicha, tur populyatsiyasining qisqarib ketishida kuchli antropogen ta’sir va ekologiyaning keskin o‘zgarib borayotganligi sabab bo‘lmoqda.