Elektroshoker va elektrodubinkalar. Ichki ishlar xodimlari yangi quroldan qanday vaziyatda foydalanadi?

O‘zbekistonda Ichki ishlar vazirligi deyarli barcha mahalliy bo‘linmalarini elektr toki urish moslamalari (ESHU) bilan jihozladi. Bu haqda vazirlik Matbuot xizmati QALAMPIR.UZ’ga xabar berdi.

Ichki ishlar organlari xodimlariga patrul va qorovullik vazifalarini bajarish, shuningdek, jamoat tartibini ta’minlash uchun elektroshokerlar, elektrodubinkalar va elektr to‘pponchalar berilmoqda.

Qayd etilishicha, huquqni muhofaza qilish organi xodimi tomonidan maxsus vositalardan, shu jumladan ESHUdan foydalanish tartibi O‘zbekistonning “Ichki ishlar organlari to‘g‘risida”gi qonuni, shuningdek, Ichki ishlar vazirligining tegishli ko‘rsatmasi bilan belgilanadi.

Ma’lum qilinishicha, ESHUdan foydalanishga IIV tomonidan tasdiqlangan va Sog‘liqni saqlash vazirligi bilan kelishilgan maxsus tayyorgarlikdan o‘tganligini belgilovchi sertifikatni olgan xodimlarga ruxsat beriladi.

Ichki ishlar organlari xodimi o‘ziga yoki fuqaroga qilingan hujumni qaytarishda, jinoyatni yoki huquqbuzarlikni bostirishda, jinoyatda ushlangan va qochishga urinishda, qo‘lga olingan fuqarolar va binolarni ozod qilishda hamda ommaviy tartibsizliklarni bostirishda ESHUdan foydalanishi mumkin.

Ichki ishlar xodimlari Rossiyaning “Mart grupp” zavodi tomonidan ishlab chiqarilgan ESHU moslamalari bilan qurollantiriladi.