Buyuk Britaniyada uchinchi marta lokdaun e’lon qilindi

Buyuk Britaniya Bosh vaziri Boris Jonson koronavirus infeksiyasining ko‘payishi sababli mamlakatda yangi milliy lokdaun joriy etilishini e’lon qildi. Bu haqda u xalqqa murojaatida ma’lum qilgan.

“Virusning yangi varianti juda tez tarqalmoqda. Shubhasiz, uchinchi milliy lokdaun zarur. Bu koronavirusni nazorat ostiga olish va mamlakatda keng ko‘lamli emlashlarni amalga oshirishga yordam beradi”, deydi Jonson.

Bosh vazirning so‘zlariga ko‘ra, yangi koronavirus turining tarqalishi rasmiylarni xavotirga solmoqda.

 “Bizning COVID-19 ga qarshi kurashish bo‘yicha birgalikdagi sa’y-harakatlarimiz virusning yangi turi bo‘lmagan taqdirda ham ishladi va bundan keyin ham ishlaydi”, deydi Jonson. 

Uning ta’kidlashicha, olimlar yangi shtamm avvalgilariga qaraganda 50-70% yuqumli ekanini allaqachon isbotlagan. Shu nuqtai nazardan, kasalxonalar hozirgi kunda pandemiya davridagi har qanday vaqtga qaraganda ancha katta yukni boshdan kechirmoqda va sog‘liqni saqlash tizimining resurslari yangi choralar ko‘rilmasa, uch hafta ichida o‘zlarini charchatishi mumkin.

Cheklovlar bugun, 5 yanvardan kuchga kiradi. Ertadan boshlab, Buyuk Britaniyaning barcha boshlang‘ich va o‘rta maktablari masofadan o‘qitishga o‘tadi. Bundan tashqari, rasmiylar yakuniy imtihonlar jadvalini qayta ko‘rib chiqadi. Asosiy taqiqlar 6 yanvarda kuchga kiradi. O‘z-o‘zini majburiy izolyatsiya qilish butun mamlakat bo‘ylab joriy etilad. Fuqarolarga uylaridan faqat ishlash uchun chiqish, oziq-ovqat va zarur narsalarni sotib olish, tibbiy yordam olish yoki sport bilan shug‘ullanish uchun ruxsat beriladi.

Kecha, 4 yanvar kuni tibbiyot xodimlari va Buyuk Britaniya Sog‘liqni saqlash vazirligi qo‘shma bayonot berdi, ular rasmiylarni mamlakatda epidemiya xavfi darajasini maksimal beshlikka ko‘tarishga chaqirdi. Murojaat mualliflarining ta’kidlashicha, aks holda milliy tibbiyot bemorlar oqimining ko‘payishiga dosh berolmaydi.