Buffon “Parma” bilan shartnomasini uzaytirdi

Janluijji Buffon hali beri faoliyatini yakunlash niyatida emas. 44 yoshli italiyalik darvozabon “Parma” bilan 2024 yilgacha mo‘ljallangan shartnoma imzoladi.

Shartnoma imzolangach, Janluijji Buffon barcha kutgan voqealik sodir bo‘lgani haqida aytgan.

“Bu ajoyib kun. Men, prezident, muxlislar va umid qilamanki, butun shahar xohlagan hodisa bo‘ldi”, degan Buffon.

Ma’lumot o‘rnida, Buffon professional faoliyatini 1994 yili aynan  “Parma” tarkibida boshlagan. 2001 yilda u 52,8 million yevro evaziga Turinning “Yuventus” klubiga transfer qilingan. “Zebralar” bilan Janluiji eng yulduzli davrlarini o‘tkazdi. Italiyalik pospon orada bir mavsum PSJ da ham ko‘rinish berdi. Keyin yana Turinga qaytdi. 2021 yilda esa “Yuventus”ni tark etib “Parma”ga ko‘chib o‘tdi va ushbu klub sharafini Italiyaning ikkinchi darajali musobaqasi bo‘lgan B Seriyada himoya qilib kelmoqda. Buffon joriy mavsumida u 23 ta o‘yin o‘tkazib, 23 ta gol o‘tkazib yuborgan.

Ma’ruf Abdumalikov