Braziliyada Pelening vafoti munosabati bilan uch kunlik motam e’lon qilindi

Braziliya hukumati futbolchi Pelening vafoti munosabati bilan mamlakatda uch kunlik motam e’lon qildi. Bu haqda “Noticias Uol” nashri xabar berdi.

“Ushbu farmon e’lon qilingan kundan e’tiboran Edson Arantes du Nasimento (asl ismi) yoki sobiq futbolchi Pelening vafoti munosabati bilan uch kunlik umummilliy motam e’lon qilinadi”, deyiladi hukumat farmonida.

Motam munosabati bilan butun Braziliya bo‘ylab bayroqlar yarmiga tushiriladi.

Bundan tashqari, Rio-de-Janeyrodagi “Najotkor Masih” haykali Pele xotirasiga Braziliya bayrog‘i ranglariga bo‘yalgan. Bunday yorug‘lik bilan haykal bir kun turadi.

Braziliyaning iste’foga chiqqan Prezidenti Jair Bolsonaru matbuot xizmati Pelening global sport uchun ahamiyatini ta’kidladi.

“U yagona uch karra Jahon kubogi g‘olibi bo‘lib, nafaqat buyuk sportchi, balki qayerga bormasin, Braziliyaga shon-sharaf keltirgan buyuk fuqaro va vatanparvar ekanligini amallari bilan isbotladi”, deyiladi hukumat xabarida.

Pele Santos shahrida dunyodagi eng katta qabriston sifatida Ginnesning rekordlar kitobiga kiritilgan vertikal qabristonga dafn etiladi. Braziliya ommaviy axborot vositalari tarqatgan xabarlarga ko‘ra, futbolchi 19 yil avval ushbu qabristondan joy sotib olgan. 30 qavatli bino uning do‘sti tomonidan qurilgan.

Xotira marosimi Pelening sobiq futbol klubi Santos stadionida, San-Paolo shtatidagi shu nomli shaharda bo‘lib o‘tadi. Marosim 2 yanvar, dushanba kuni mahalliy vaqt bilan soat 10:00 da boshlanadi.

Eslatib o‘tamiz, Pele 82 yoshida 29 dekabr kuni kechki vaqtda saratondan San-Paolodagi xususiy shifoxonada vafot etdi. U mazkur kasalxonaga bir oy oldin yo‘g‘on ichak saratoni tufayli yotqizilgan edi.

Ma’lumot o‘rnida, Pele Braziliya terma jamoasi bilan uch karra jahon chempioni bo‘lgan. Xalqaro futbol federatsiyasi Peleni XX asrning eng yaxshi futbolchisi deb tan oldi. U o‘yinchi sifatida uch marta jahon chempioni bo‘lgan dunyodagi yagona futbolchi. Bu 1958, 1962 va 1970 yillarda sodir bo‘lgan. U Braziliya terma jamoasi safida 92 ta o‘yinda maydonga tushib, 77 ta gol urgan.

Sohiba Komilovna