Bloger TikTok'dagi jonli efir vaqtida onasi va buvisini kaltakladi (video)

Rossiyaning Volgograd shahrida bloger TikTok'dagi jonli efir vaqtida onasi va buvisini kaltakladi. Hozirda yigitga nisbatan huquq-tartibot idoralari xodimlari tomonidan tekshiruv boshlandi. Bu haqda mahalliy nashrlar yozmoqda. 

Qayd etilishicha, yigitning onasi va buvisi unga baland musiqa sabab tanbeh bergan. Yigit bunga haqorat bilan javob qaytargan. Keyin esa "tiktoker" onasiga tashlanib, uni ura boshlagan. Shu orada xonaga uning buvisi kirib, ayolga yordam bermoqchi bo‘lgan. Biroq, keksa ayol nabirasini to‘xtata olmagan, yigit esa ularni urib, xonada uloqtira boshlagan. Natijada keksa ayol yiqilgan va yordam so‘rab, baqirishni boshlagan. Ona esa yigitga politsiyaga qo‘ng‘iroq qilishini aytgan.

Aytish joizki, “tiktoker”ning akkaunti hozirda mavjud emas. Uning obunachilari esa yigitning qilig‘ini qoralashgan.

Ma’lumot o‘rnida, bu huquq-tartibot idoralari e’tiborini tortgan birinchi holat emas.Avvalroq ham yigit bilan bog‘liq shov-shuvli video ijtimoiy tarmoqlarda tarqalgan. Unda yigit g‘alati holatda ayollar bilan urushayotgani va ularning qichqiriqlari eshitilgan. Yigitning o‘zi ham keyinchalik buvisi bilan ba’zida janjallashib turishini aytgan.