Bitkoin narxi bo‘yicha tarixiy rekordini yangiladi 

Bitkoin kriptovalyutasining narxi 47 ming dollardan oshib, tarixiy rekordini yangiladi. Bu haqda "Binance" birjasidagi savdo ma’lumotlari darak bermoqda. 

Raqamli valyutaning narxi 47 ming 460 dollarga ko‘tarilgan. 

Ta’kidlanishicha, o‘tgan kun davomida kriptovalyuta o‘zining tarixiy maksimumini bir necha bor yangilagan. 

Ma’lumotlarga ko‘ra, Amerikaning Tesla Inc. kompaniyasi bitkoinlarga 1,5 milliard dollar sarmoya kiritgan va o‘shandan keyin kriptovalyutaning narxi qimmatlashishni boshlagan. 

Bitkoin – bu blokcheyn texnologiyasiga asoslangan, shu tizimda ishtirok etuvchi har qanday foydalanuvchi tomonidan “qazib olinishi” (chiqarilishi) mumkin bo‘lgan kriptovalyuta. Buning uchun tizimning yangi bloklarini yaratish kerak bo‘ladi. 

Tizimning konsepsiyasi 2008 yil noyabr oyida o‘zini Satoshi Nakamoto deb tanishtirgan muallif (balki, mualliflar jamoasi) tomonidan chop etilgan. Lekin bitkoin mashhurligining eng yuqori darajasi so‘nggi yillarda qayd etilgan. Hozirgi paytga kelib ko‘pgina bitkoinlar allaqachon “qazib olingan” hisoblanadi.