Behzod Musayev Sog‘liqni saqlash vaziri etib tayinlanishi kutilmoqda

O‘zbekiston Sog‘liqni saqlash vaziri lavozimiga Behzod Anvarovich Musayev tayinlanmoqda. Bu haqda Oliy Majlis Qonunchilik palatasi deputati Rasul Kusherboyev ma’lum qildi.

Kusherboyevning yozishicha, Bosh vazir o‘rinbosari lavozimida ishlab kelayotgan Behzod Musayev nomzodi deputatlar tomonidan ko‘rib chiqilib, tasdiqlanishi kutilmoqda.

Behzod Musayev 2020 yil 14 maydan beri Bosh vazirining ijtimoiy rivojlantirish masalalari bo‘yicha o‘rinbosari lavozimida faoliyat yuritib kelmoqda.  

Behzod Musayev 1973 yilda Toshkent shahrida tug‘ilgan. Ma’lumoti oliy. 1995 yilda Toshkent davlat iqtisodiyot universitetini, 2004 yilda O‘zbekiston Respublikasi prezidenti huzuridagi Davlat va jamiyat qurilishi akademiyasi qoshidagi Oliy biznes maktabini tamomlagan.

U 2010-2011 yillarda Soliq qo‘mitasi raisi birinchi o‘rinbosari lavozimida faoliyat yuritgan, uning 2011 yildan 2016 yilgacha bo‘lgan faoliyati haqida ma’lumot yo‘q. U 2018 yilning mart oyida Davlat soliq qo‘mitasi raisining birinchi o‘rinbosari vazifasiga, o‘sha yili dekabr oyida esa Davlat soliq qo‘mitasi raisi etib tayinlangandi.